Вышыванка для вашага Янкі
Дзе знайсці нацыянальныя беларускія ўборы?
Умець вышываць і ткаць даўней мусіла і княгіня, і сялянка. Сёння паспяховая жанчына не лічыць гэта абавязковым. Чытаць‑пісаць навучыліся, камп’ютар асвоілі, кар’еру спланавалі, а на захаванне даўніх умельстваў часу не стае.
Аднак вышыванкі, ручнічкі і фартушкі па‑ранейшаму вабяць дзявочае вока. Можна было б на Дзень святога Валянціна любаму кашулю падарыць, ці ў госці сукенку вышываную адзець, ці на іспыт паяском тканым падперазацца, як абярэгам.
Дзе ўзяць вышыванку? Першы варыянт— зрабіць сваімі рукамі. Знайсці арнамент, які падабаецца, і вучыцца вышываць. Старанна ўкладаць усе добрыя пачуцці і энергетыку ў твор. Такую вышыванку не сорамна будзе ні самой апрануць, ні любаму падарыць, бо яна ад душы.
А калі няма часу і магчымасці? Ці так здарылася, што рукі і іголка з ніткаю сустракаліся ў жыцці так рэдка, што і пазнаёміцца не паспелі?
У Мінску вышыванку можна набыць на прадпрыемстве «Скарбніца» (вул. Кісялёва, 40). Акрамя традыцыйнага народнага ці сцэнічнага касцюма, там можна сабе замовіць сучасную вопратку з нацыянальным арнаментам ці традыцыйную вышыванку для каханага. За 100—120 тысяч вам зробяць касцюмчык вашага памеру з нескладанай вышыўкай. Аднак, чым складанейшая замова, тым даражэйшае будзе адзенне. Супрацоўнікі «Скарбніцы» ездзяць у этнаграфічныя экспедыцыі, працуюць у бібліятэках і архівах. Яны здольныя стварыць адзенне з характэрнымі матывамі пэўнай мясцовасці. Напрыклад, вашай малой радзімы.
Таксама нацыянальныя беларускія ўборы можна знайсці ў крамах «Купалінка» (пр.Незалежнасці, 19), у галерэях «Славутыя майстры» (Камунальная набярэжная, 6Б) і «Славутасць» (вул.Багдановіча, 21, 2‑і паверх) ці ў Рэспубліканскім культурна‑асветніцкім цэнтры (вул.Кастрычніцкая, 5).
Паспрабуйце аднойчы падарыць сябрам не званочак па фэн‑шую «мэйд ін чайна», а вышываначку па‑беларуску. І хай яна будзе на шчасце‑долю.
