Vopratka ź biełaruskimi arnamientami zavajoŭvaje Polšču
Pakul u Biełarusi aktyŭna abmiarkoŭvajuć vyšyvanki i arnamienty, u Polščy moda na etnavopratku, u tym liku biełaruskuju, nabiraje abaroty. U Biełastoku źjaviŭsia novy brend Xoroshe, čyjo adzieńnie z tradycyjnymi biełaruskimi i polskimi arnamientami imkliva nabiraje papularnaść u Polščy.
«Budźma» parazmaŭlała z žycharkaj Padlašša, stvaralnicaj brenda adzieńnia Xoroshe Mahdalenaj Pietruk pra «vyšyvankavy bum» i modu na etničnaje adzieńnie.
– Čamu vy vyrašyli źviarnucca da tradycyjnych arnamientaŭ? Nakolki vierahodna, što takoha kštałtu vopratka moža stać nasamreč modnaj?
– Kožnamu čałavieku patrebnaje pačućcio prynaležnaści, adčuvańnie taho, kim jon jość i adkul jahonyja karani. Tradycyjnyja ŭzory ŭ modzie tamu, što heta adzin sa sposabaŭ vykazvańnia viernaści svajoj małoj Baćkaŭščynie. Asabista dla mianie takoj małoj ajčynaj źjaŭlajucca Padlašša i Paleśsie, jak ź biełaruskaha, tak i z polskaha boku. Možna zaŭvažyć, što moładź stamiłasia być hramadzianami śvietu i ŭsio čaściej cikavicca tym, što blizkaje, svajo, tradycyjnaje. Narodnyja, rehijanalnyja stroi byli nadzvyčaj modnyja ŭ 1914 hodzie, žančyny dzialilisia ŭzorami fartuškoŭ, vyšyvali bahata azdoblenyja saročki, tamu što tyja vyšyvanki byli nie tolki pryhožyja, ale i modnyja. My pryvykli ŭsprymać modu taho času jak štości muziejnaje, izalavanaje ad katehoryj sučasnaha myśleńnia, a čamu ŭzory našych babul nie mahli b viarnucca ŭ formie haradskoj mody ŭ 2014 hodzie?
– Vy vykarystoŭvajecie nie tolki polskija, ale i biełaruskija arnamienty. Ci padkreślivajecie vy ich biełaruskuju prynaležnaść?
– Mianie natchnili arnamienty, typovyja dla biełaruskaj mienšaści ŭ Polščy, ułasna na Padlaššy. Što cikava, niahledziačy na toje, što praz hety rehijon prajšła dziaržaŭnaja miaža, takija samyja ŭzory dasiońnia možna znajści ŭ vakolicach Kobryna i Bieraścia.
– Kaho vy ličycie svajoj metavaj aŭdytoryjaj?
– U pieršuju čarhu padlašukoŭ, palešukoŭ i biełarusaŭ naohuł, ale spadziajusia na toje, što našyja ŭzory takija charošyja i aryhinalnyja, što znojduć svaich prychilnikaŭ i vyjduć za miežy našaha kulturnaha rehijona. Pieršyja prajavy cikavaści da majoj kalekcyi ŭžo prychodzili, naprykład, z Kapienhahiena.
– Nakolki tema «narodnaj vopratki» vostraja ŭ Polščy?
– Maja firma sustrakajecca ź vialikim zacikaŭleńniem. U Polščy panuje moda na etnadyzajn i asučaśnienyja falkłornyja rečy. Asabliva papularnyja ŭzory takich rehijonaŭ, jak Kašuby, Łovič, Kurpie, a taksama ŭsio toje, što asacyjujecca z horskimi rehijonami na poŭdni Polščy. Chaciełasia b, kab padlašska-paleskija ŭzory stali takimi ž papularnymi.
– Na vašuju dumku, ci čakaje takoha kštałtu vopratku adradžeńnie?
– Biezumoŭna.
– Jak i dzie možna zamović vašuju pradukcyju?
– Vopratku Xoroshe možna nabyć u Biełastoku, u internet-kramie www.xoroshe.pl, a ŭ Biełarusi možna budzie kupić praz kramu www.prastora.by.