Zachavańnie Bresckaj krepaści prafinansuje pasolstva ZŠA
Biełaruskaja arhanizacyja «Fond raźvićcia Bresckaj krepaści» atrymaje bolš za $100 tys. na invientaryzacyju i dakumientacyju źniešnich fartoŭ i ŭmacavańniaŭ krepaści Brest-Litoŭsk, jakija nie ŭvachodziać u skład miemaryjalnaha kompleksu «Bresckaja krepaść-hieroj», paviedamili ŭ pasolstvie ZŠA.
Fond raźvićcia Bresckaj krepaści atrymaje heta finansavańnie, staŭšy adnym ź pieramožcaŭ prestyžnaha suśvietnaha konkursu ŭ ramkach «Pasolskaha fondu zachavańnia kulturnaj spadčyny» ŭ 2014 hodzie.
«Pasolski fond zachavańnia kulturnaj spadčyny» źjaŭlajecca prahramaj Dziaržaŭnaha departamienta ZŠA, jakaja ažyćciaŭlajecca bolš čym u 125 krainach i nakiravana na zachavańnie materyjalnych i niemateryjalnych abjektaŭ, što pradstaŭlajuć kulturna-histaryčnuju kaštoŭnaść.
Va ustanovie paviedamili, što z 2001 hoda partniorami fondu stanavilisia Nacyjanalnaja biblijateka Biełarusi, muziej Marka Šahała, Viciebski art-centr, hrupa «Stary Olsa» i Biełaruski dziaržaŭny ŭniviersitet kultury i mastactvaŭ. «Pasolstva taksama z zadavalnieńniem adznačaje tradycyi supracoŭnictva z Bresckaj vobłaściu pa zachavańni kulturna-histaryčnaj pamiaci, pačatak jakomu byŭ pakładzieny sumiesnym prajektam pa adnaŭleńni doma-siadziby Tadevuša Kaściuški pad Kosava ŭ Ivacevickim rajonie, i pastajannaj padtrymkaj adkrytaha ŭ im muzieja ekspanatami i abstalavańniem», - adznačyli ŭ dyppradstaŭnictvie.
Taksama pasolstva ZŠA raźličvaje na praciah supracoŭnictva ź biełaruskimi partniorami pa pošuku i zachavańni kulturnaj spadčyny rehijona.
