«Skarynaŭskija dni ŭ Połacku» — 5-7 vieraśnia
Śviata «Skarynaŭskija dni ŭ Połacku» projdzie ŭ staražytnym biełaruskim horadzie z 5 pa 7 vieraśnia ŭ čas Dnia biełaruskaha piśmienstva, paviedamili ŭ Połackim rajvykankamie.
Svojeasablivym prałoham Dzion stanie dabračynny prajekt «Padary dzieciam knihu», jaki pačynajecca siońnia i pradoŭžycca da 4 vieraśnia. Sabranyja ŭ čas akcyi knihi papoŭniać biblijateki sacyjalnych prytułkaŭ i škoł-internataŭ rajona.
Startuje śviata Alimpijadaj pa aratarskim majsterstvie i napisańni ese, jakaja projdzie 5 vieraśnia siarod vučniaŭ Połackaj dziaržaŭnaj himnazii numar 2. U hety ž dzień va ŭstanovach adukacyi buduć dadzieny ŭroki «Połackaznaŭstva» pa temach: «Vialiki syn Połackaj ziamli», «Vialiki pačynalnik Francysk Skaryna». U škołach buduć arhanizavany tematyčnyja vystaŭki vydańniaŭ ź siamiejnych biblijatek i prezientacyi staradaŭnich knih, projdzie randevu z knihami Francyska Skaryny i Simiaona Połackaha i ekspres-ahlad «Knihi abo kampjutar».
Nie zastaniecca ŭbaku i Połacki dziaržaŭny ŭniviersitet. Tut budzie arhanizavany interaktyŭny konkurs pa raspracoŭcy i stvareńni elektronnaj knihi, projduć vystaŭka «Univiersitety Francyska Skaryny» i vystaŭka-prezientacyja drukavanych rarytetaŭ z fondaŭ Nacyjanalnaha Połackaha historyka-kulturnaha muzieja-zapaviednika.
Nasyčanym na mierapryjemstvy abiacaje być dzień 6 vieraśnia. Na alei praśpiekta Francyska Skaryny budzie arhanizavana rabota litaraturnych sałonaŭ «Čaroŭnaja siła mastactva» (prezientacyja knih połackich paetaŭ), litaraturnaha kafe «Uroki vydatnaj asoby», razhorniecca fotavystaŭka «Kniha i čytańnie» i vystaŭka dekaratyŭna-prykładnoha mastactva ŭstanoŭ adukacyi Połacka i Połackaha rajona. Kala pamiatnaha znaka «Ŭ» u muzyčnaj panaramie vystupiać vučni Połackaj dziciačaj škoły mastactvaŭ, na płoščy Francyska Skaryny budzie arhanizavana kancertna-zabaŭlalnaja prahrama «My — naščadki Skaryny».
Aktyŭnymi śviatočnymi zonami stanuć placoŭki la biblijatek. Rajonnaja centralnaja adkryje litaraturny bulvar «Čytaj horad», dzie kožny prachožy budzie mieć mahčymaść vypić čaju i sfatahrafavacca z Francyskam Skarynam, prakansultavacca ŭ biblijaterapieŭta, aznajomicca z vystaŭkaj «Ad małoha da vialikaha». Tut ža raźmieścicca placoŭka dla padletkaŭ «Riders-tusoŭka». Kala biblijateki imia Ja.Kupały buduć arhanizavany fotaviernisaž, mini-kviest «Ad hlinianaj tablički da elektronnaj knihi», majstar-kłasy pa book-arcie «Cuda-knihu stvorym».
U śviatočnyja dni ŭ Dziciačym muziei budzie pracavać vystaŭka «Padručnik-čaraŭnik», jakaja raskaža ab tym, jak źjaviŭsia pieršy bukvar, jakija knihi vydavalisia dla dziaciej u pačatku minułaha stahodździa i ab tym, jakija naohuł byvajuć bukvary. U ekspazicyjnych załach Muzieja biełaruskaha knihadrukavańnia buduć pravodzicca muziejna-piedahahičnyja zaniatki. Akramia taho, u školnikaŭ budzie mahčymaść pryniać udzieł u stvareńni knihi ź piśmami naščadkam, jakaja budzie zachoŭvacca ŭ Muziei biełaruskaha knihadrukavańnia.
Francysk Skaryna - adzin z najvialikšych histaryčnych dziejačaŭ, vialiki aśvietnik i zasnavalnik biełaruskaha knihadrukavańnia, u honar jakoha zasnavany vyšejšyja ŭznaharody Biełarusi - miedal i orden, jaho imiem nazvany ŭstanovy adukacyi, vulicy, praśpiekty, ustanoŭleny pomniki. U Połacku imia Francyska Skaryny maje centralnaja haradskaja biblijateka, himnazija numar 1, płošča, praśpiekt i vulica. U centry horada ŭstanoŭleny pomnik vialikamu aśvietniku.
