Znajści
Ałharytmičny łacinski varyjant
16.08.2016 / 14:567RusŁacBieł

Parnikovy defiekt: Viktar Marcinovič pra vystavu fatohrafa «Našaj Nivy»

Kali b ja ŭ adnoj mietafary vyznačaŭ ciapierašni momant isnavańnia biełaruskaj sistemy, heta było b pierasychańnie bałota. Usia faŭna, žaby, niajasyci, supracoŭniki rajvykankamaŭ, viartlavyja čarotki, kamary dy vužaniaty jašče spadziajucca na toje, što łafa vierniecca, što budzie jak raniej: tannyja kredyty na žytło, zastoj, biespraśvietnaść, hodny zarobak. Ale žyćciatvornaja vilhać sychodzić, a ź joj — kamfort i ŭpeŭnienaść u tym, što paślazaŭtra budzie hetaksama, jak pazaŭčora.

Fota: Valeria Martynova / CECH

Vystava Siarhieja Hudzilina ŭ «CECHu» taksama pracuje ź simvolikaj vadkaści, ale adkidaje mietaforyku bahny (jak najbolš vidavočnuju) i źviartajecca da vobraznaści parnika. Usia ekspazicyjnaja prastora aformlenaja niby alšanski parnik, na cełafanie jakoha asiadaje lipkaje dychańnie kandensatu. U imia apošniaha i nazvanaja najbolš važnaja dla hetaha leta fotapadzieja.

Na ŭvachodzie nas sustrakajuć cytaty ź Vikipiedyi, jakija tłumačać, što kandensat jość praduktam pieraŭtvareńnia materyi z parapadobnaha ŭ vadki stan. Možna razharnuć hetuju mietafaru i dadavać, što vizualny kandensat, jaki trapiŭ na ścieny vystavy Hudzilina, jość praduktam vyparvańnia samlełaha biełaruskaha bałota.

Volha Bubič nazyvaje Hudzilina «samym dziorzkim fotažurnalistam Biełarusi». Ja b zaznačyŭ, što žurnalista ŭ Hudzilinie nie bolej, čym było rekłamista ŭ Kurcie Vaniehacie. Jość ludzi, jakim dadziena krychu bolej za inšych. Hledziačy naŭkoł, jany bačać toje, što zastajecca pa-za fokusam u kaleh. I niavažna, pad kaho jany maskirujucca, kab sabrać materyjał: pad śpiecyjalistaŭ pa suviazi z hramadskaściu (Vaniehut u General Electrics) ci ŭ instruktaraŭ pa kurahadoŭli (Michaił Zoščanka ŭ Lihavie) — jany najpierš tvorcy, jakija vynachodziać Malevičaŭ «prybavačny elemient». Z dapamohaj jakoha paŭsiadzionnaść pieratvarajecca ŭ mastactva.

Čałaviek, jaki ŭvažliva sočyć za Hudzilinym, nie znojdzie na «Kandensacie» novych fotazdymkaŭ: bačyli, zachaplalisia, viedajem. Siurpryzam buduć chiba što «postfatahrafičnyja» ekśpierymienty Siarhieja sa źmiaščeńniem kartačak na katonavych vadałazkach. Medium is the message, pieraŭtvareńnie zdymka ŭ abjekt movy źmianiaje sens fatahrafii. Ja b voś z zadavalnieńniem nabyŭ chudzi ź dziaŭčynaj u biełaruskaj vazie z parada na Dnie niezaležnaści, kab zrabicca saŭdzielnikam Siarhieja pa zasvajeńni prastory biełaruskaha horada pieryjadu postkvitnieńnia. Ale vyklučna vobraznaści zamała dla taho, kab zrabić surjoznuju vystavu paśla Dziušana.

#kandensat Hudilina!

Foto opublikovano Ivan Vedenin (@ispirito)

«Kandensat» cikavy, paŭtarusia, nie fotazdymkami, jakija možna pabačyć nie tolki tut. I nie daścipnym kuratarskim abhruntavańniem, a mienavita svaim «prybavačnym elemientam». Dla Dziušana takim elemientam była aprapryjacyja, dla Maleviča — ekanomija, u vypadku z Hudzilinym my bačym Biełaruś, pieraviedzienuju na movu hlitču. Pahladzicie chacia b hety tyzier — hlitč tut nie tolki ŭ zastaŭcy, nie tolki ŭ chaatyčnaj i niby vypadkovaj źmienie kadraŭ, ale i ŭ hukavym vymiareńni, u muzycy chaosu.

Kali ja pabačyŭ płakat mierapryjemstva Siarhieja, ja byŭ vielmi ździŭleny: hlitč upieršyniu zajaviŭ pra siabie ŭ 2010-ja. Pieršaj biełaruskaj fotamastačkaj, jakaja pracavała ŭ hetaj stylistycy, była Alina Krušynskaja, adpaviednaja vystava ŭ Aliny adbyłasia jašče ŭ 2011 u Kłajpiedzie. Dyk čamu taki ryzykovy pijanier, jak Siarhiej, źviarnuŭsia da hetaj užo dobra raspracavanaj movy, jakaja pierajšła ŭ mejnstrym i sustrakajecca navat u klipach na MTV?

Usio patłumačyŭ pachod na vystavu.

Malevič bačyŭ ekanomiju čyńnikam, jaki vioŭ (prynamsi, u jahonych tearetyčna-mastactvaznaŭčych raspracoŭkach) mastactva «ad realizmu» praz «siezanizm, impresijanizm dy kubizm» — da najvyšejšaj stupieni raźvićcia dy «abnuleńnia», da suprematyzmu.

Hudzilinski hlitč — najvyšejšaja stupień spaścižeńnia toj Biełarusi, jakaja atačaje nas u prastory pamiž televizaram i sialanskaj dyskatekaj. Chipstar skaža, što heta, moža, i nie samaja pryjemnaja forma isnavańnia našaj radzimy, ale čałaviek, jaki piŭ čarniła z pacanami ŭ Aśviei, abarvie: jana najbolš nieasprečnaja. Bieź jaje ad Biełarusi zastajecca tolki smuzi i Pinky Bandinskiy.

Kab zaćvierdzić svaju sistemu pohladaŭ na žyvapis, Malevič napisaŭ «Ab novych sistemach u mastactvie», vydavać jakuju i pryjechaŭ u Viciebsk. Kab patłumačyć, što hlitč jość niepaźbiežnym rezultatam sutyknieńnia śviadomaści ź Biełaruśsiu, Hudzilin pačynaje svaju vystavu ź filma. Hety vaśmichvilinny pradukt ja pakazvaŭ by ŭsim zamiežnym halerystam i kurataram, kab vielmi koratka patłumačyć, što takoje našaja niezaležnaja respublika jak sistema simvałaŭ.

Heta takaja šyzakarcinka, jakaja pačynajecca z frahmientaŭ intervju Maksima Žbankova z samim Hudzilinym (na adkazy Hudzilina nakładzienaje recha, praź jakoje kožnaje słova mastaka nabyvaje dadatkovuju vartaść), dalej — uklučaje ŭ siabie zdymki mazurykaŭ, jakija tančać u ciemry, dupu kania, jaki vałače apieratara praź biełaruskija śniahi. U hetym vyčarpalnym filmie niejki dziadźka z televizara ź ministerskim vidam tłumačyć, što kultura zaležyć ad vytvorčaści małaka, babulki śpiavajuć u kaściole (ź ich ratoŭ vyryvajecca para, tak, što vidać, jak tam, u tym kaściole, chałodna), uračysty hołas abviaščaje prezidenta Respubliki Biełaruś pry jaho źjaŭleńni ŭ parłamiencie…

Mieniu dla prodkau #kandensat #hudzilin #photo #belatus #vystava

Foto opublikovano Nadya Shepel (@nadyashe)

Tut niama nivodnaha momantu, jaki b nie mieŭ šyzafreničnaj padkładki, nivodnaj repliki, skazanaj biez nakładki televizara, infiernalnaha «Kłuba redaktaraŭ» ci sapraŭdnaha saŭndčeku pierad pačatkam aficyjnaha paradu. Zdymki ŭzhanarody «najlepšych ahraryjaŭ» abryvajucca zmročnymi kadrami taho, jak maŭklivy mužyk u botach zanurana baranuje ziamlu. Ci voś babula siadzić u kviacistaj sukiency na kitajskaj pokryŭcy, i heta ŭsio — pad hołas dyktara, jaki razvažaje pra simvały biełaruskaj dziaržaŭnaści. Kabiety na rovarach, katy na płatach, dyktarka navin, jakaja ŭračysta paviedamlaje, što «biełarusy ciapier buduć pračynacca na hadzinu raniej za jeŭrapiejcaŭ» — praz try, čatyry prahony hetaha vaśmichvilinnaha filma da ciabie raptam dachodzić:

Hlitč jak taki jość vizualizacyjaj ličbavaj pamyłki, što źniščaje fotki na kartcy. Hudzilinaŭ hlitč — heta psichičny stan, jaki niepaźbiežna achinaje pilnaha čałavieka, što žyvie va ŭžo zhadanym pramiežku pamiž viaskovaj dyskatekaj i tranślacyjaj Dnia niezaležnaści pa BT. Hlitč Hudzilina — heta nie tolki jahonaja ŭnikalnaja mova, heta dyjahnaz cełaj krainie, jaje audio dy video.

…Ja syšoŭ z «CECHu», ja apynuŭsia na vulicy Kastryčnickaja, upeŭnieny ŭ tym, što pakinuŭ psichadeliju hudzilinaŭskaha hlitču tam, za cełafanavymi dźviaryma. I voś raptam, jak toj strašenny ahrehat u klipie Chemicals, na mianie skočyła tolki što pieražytaje. Niejkim čynam prosta na chodnikach apynulisia prasaŭščycy, jakija staranna vazili pramysłovyja prasy pa doškach. Tut ža, u pary i tłumie, byli raźviešany šeryja stroi i žanočyja spadnicy, i badziory televizijny hołas bubniŭ, bubniŭ i raptam abrezaŭ: «Infarmacyja pradstaŭlenaja analityčnym centram Jandeks-probki».

Spatrebiłasia skancentravacca, kab zrazumieć, što ja znachodžusia nie znutry ekspazicyi «Kandensat», a akurat nasuprać fitnes-kłuba «Mobi Dzik», pobač z šyroka adkrytym aknom vialikaj chimčystki, ź jakoj na mianie i skočyli tyja prasy dy stroi.

Potym ja spuściŭsia ŭ mietro, dzie mužčyna ŭ formie Ministerstva pa nadzvyčajnych situacyjach čytaŭ časopis pra sadavodstva akurat pad rekłamaj kaśmietyki dla barady (z dastaŭkaj dachaty!), pa vahonie biehali junaki, jakija imitavali taniec doktara Zojdbierha z «Futuramy», a błandzinka na abcacach, jakimi Brut lohka zabiŭ by Julija Cezara, padfarboŭvała vočy, hledziačysia ŭ kamieru ŭłasnaha telefona.

I tut mnie zrabiłasia pa-sapraŭdnamu strašna. Bo ja zrazumieŭ, što hudzilin-hlitč-šou u majoj hałavie moža ciapier nie skončycca naohuł nikoli. Psichadeličnaja vystava «Kandensat» nie rekamiendavanaja ludziam sa słabaj ci niaŭstojlivaj psichikaj. Hetaksama jak i žyćcio ŭ Respublicy Biełaruś.

Vystava Siarhieja Hudzilina «Kandensat» demanstrujecca ŭ prastory CECH da kanca žniŭnia. Nabyć kvitok, paštoŭki ci aŭtarskuju pracu možna praz płatformu Talaka.by.

Viktar Marcinovič, Budzma.by

Chočaš padzialicca važnaj infarmacyjaj
ananimna i kanfidencyjna?

Клас
0
Панылы сорам
0
Ха-ха
0
Ого
0
Сумна
0
Абуральна
0
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera