Multsieryjał pra Miki Maŭsa pačali ahučvać pa-biełarusku VIDEA

Na płatformie Talaka pačali zbirać srodki na ahučvańnie pa-biełarusku multsieryjała Miki Maŭs. Studyja «Gavarun_by» płanuje ahučyć 25 sieryj ź siezonaŭ 2013−2014 hadoŭ. Ahulny čas 25 sieryj — kala 85 chvilin.

Pavodle arhanizataraŭ, biełaruskamoŭnaja prastora adčuvaje mocny deficyt łakalizavanaha pa-biełarusku miedyjakantentu. Asabliva heta adčuvalna ŭ dziciačym siehmiencie i z kantentam, jaki možna pahladzieć anłajn, u patrebny čas, ź luboha miesca Biełarusi j śvietu.

Łakalizavanyja pa-biełarusku sieryi multsieryjała buduć vykładvać na jutub-kanale studyi «Gavarun_by». Pravaŭładalnik, Disney Enterprises Inc, dazvalaje vykarystoŭvać na jutubie aŭdyjavizualnaje źmieściva z hetych sieryj za vyklučeńniem manietyzacyi videa, tak što pahladzieć multfilm možna budzie całkam lehalna, biez terytaryjalnych abmiežavańniaŭ.

Realizavać prajekt zapłanavana ŭ termin da dvuch miesiacaŭ paśla zboru hrošaj, to bok kožny tydzień budzie vykładacca kala troch novych sieryj. Biełaruskaja viersija hukavoj darožki stvarajecca pa praviłach zakadravaha ahučvańnia. Videašerah taksama budzie častkova łakalizavany.

Kab pahladzieć i pačuć, što za multfilm, jak heta budzie vyhladać i hučać, aŭtary zrabili piłotnuju sieryju.