Siamja amierykanca Fłojda, jaki pamior ad zadušvańnia palicyjantam, atrymaje kampiensacyju $27 miljonaŭ
Minieapalis u dasudovym paradku ŭzhadniŭ šmatmiljonnuju kampiensacyju dla siamji zahinułaha afraamierykanca. Advakat siamji Fłojda nazvaŭ heta najbujniejšym pahadnieńniem u historyi ZŠA ŭ padobnych spravach, paviedamlaje DW.
Horad Minieapalis vypłacić siamji afraamierykanca Džordža Fłojda, jaki pamior ad zadušvańnia palicyjantam, kampiensacyju ŭ pamiery $27 miljonaŭ. Takoje rašeńnie haradski saviet adnahałosna pryniaŭ na pasiadžeńni ŭ piatnicu, 12 sakavika.
Vypłata adbudziecca ŭ miežach dasudovaha ŭrehulavańnia pazovu, padadzienaha svajakami Fłojda. «Heta histaryčnaje pahadnieńnie, samaje bujnoje dasudovaje pahadnieńnie ŭ historyi ZŠA pa hramadzianskim pazovie ab hvałtoŭnaj śmierci, jakoje ŭjaŭlaje saboj zajavu ab tym, što žyćcio Džordža Fłojda mieła značeńnie, a značyć, i žyćci čarnaskurych majuć značeńnie (u aryhinale — Black lives matter)», — prakamientavaŭ kampiensacyju advakat siamji zahinułaha Ben Kramp.
Džordž Fłojd pamior 25 maja ŭ Minieapalisie paśla taho, jak, pavodle źviestak śledstva, palicyjant Derek Šavin ciaham amal dzieviaci chvilin dušyŭ jaho kalenam pry zatrymańni. Hibiel Fłojda atrymała šyrokuju ahałosku dziakujučy videazapisam vidavočcaŭ. Hałoŭnamu fihurantu vystavili abvinavačvańnie ŭ zabojstvie druhoj stupieni, trom astatnim — u dapamozie ŭ zabojstvie.
U adpaviednaści z zakanadaŭstvam ZŠA, zabojstva druhoj stupieni aznačaje, što jano było ździejśniena naŭmysna, ale biez papiaredniaha namieru, pryčym namier zaklučaŭsia ŭ pryčynieńni fizičnaj škody pry poŭnaj abyjakavaści da čałaviečaha žyćcia. Usim padazravanym pahražajuć praciahłyja terminy źniavoleńnia. Sud nad Derekam Šavinam pačaŭsia 8 sakavika.
Trahiedyja ŭ najbujniejšym horadzie štata Miniesota vyklikała ŭ krainie chvalu pratestaŭ suprać rasizmu i palicejskaha hvałtu — pieravažna pad łozunhami ruchu za hramadzianskija pravy Black Lives Matter («Žyćci čarnaskurych majuć značeńnie»). Demanstracyi pierarastali ŭ biesparadki i sutyknieńni z palicyjaj. Paźniej padobnyja pratesty prajšli ŭ mnohich inšych krainach.
