Znajści
Ałharytmičny łacinski varyjant
02.01.2022 / 09:10RusŁacBieł

Strašnyja kazki i videa, źniatyja na telefon. TOP-20 biełaruskich muzyčnych klipaŭ 2021 hoda

«Naša Niva» čaćviorty hod zapar składaje top najlepšych ajčynnych muzyčnych videa. Niahledziačy na składany dla mastactva i naohuł dla žyćcia hod, łonh-list dla našaha rejtynhu naličvaŭ bolš za 50 videa.

Uzrovień pa-raniejšamu vysoki: udzielniki topa pakinuli pa-za im nie aby-kaho, a Maksa Karža, NAVIBAND i Leru Jaskievič, tradycyjnych pradstaŭnikoŭ našych vynikovych materyjałaŭ.

Taksama rejtynh zastaŭsia biez raniejšych pieramožcaŭ: u «Daj Darohu!» i «Pietli Pristrastija» nie vyjšła novych klipaŭ. Tym bolš, najlepšaje videa 2020 hoda — «Baju-baj» ad bresckich pankaŭ — naohuł było pryznanaje ekstremisckim, a Juryj Stylski źjechaŭ z krainy. Što tyčycca «Pietli Pristrastija», to im zabaraniajuć vystupać u Biełarusi, a prezientavać novy albom minčuki vymušanyja na zamiežnych placoŭkach.

Što było ŭ papiarednija hady:

2020: Biełaruski pratest i mastactva na šerych panelkach: top-20 biełaruskich klipaŭ 2020 hoda

2019: Noŭnejmy i Lidzija Jarmošyna: 19 najlepšych klipaŭ biełaruskich vykanaŭcaŭ u 2019 hodzie

2018: Spakuślivyja tancy i hienieratar bulby: 18 najlepšych klipaŭ biełaruskich vykanaŭcaŭ u 2018 hodzie

Čym paradavaŭ 2021 hod?

20 miesca. Diempo — Kohda-nibud́

Małady indzi-hurt, jaki adkryvaje naš top, pryśviaciŭ svajo videa ŭsim tym, chto sumniajecca, ale praciahvaje. 

Da zdymak muzyki rychtavalisia try tydni, a ŭ vyniku praces zaniaŭ 20 hadzin, padčas jakich źmianiłasia šeść łakacyj, siarod jakich vialiki basiejn i baksiorski rynh. 

19 miesca. NEMIGA — Tolko nie mołči

Duet NEMIGA zdymaŭ klip u Kijevie, dapoŭniŭšy pryhožyja łakacyi i jarkija vobrazy hierojaŭ honkami na rarytetnych aŭto.

Heta videa na pieśniu pra stan cichamirnaha ščaścia, jakoje kožny moža zdabyć, znachodziačysia pobač z kachanym čałaviekam.

18 miesca. Tima Biełorusskich — Tajet jeŝio

U Cimy Biełaruskich byŭ niaprosty hod: u kancy studzienia jaho zatrymali z narkotykami, za što viasnoj jon atrymaŭ dva hady «chatniaj chimii». Paśla było intervju ŭ Juryja Dudzia, za jakoje na repiera i žurnalista padaŭ u sud łejbł Kaufman, čyim artystam jon byŭ raniej.

Ale śpisvać artysta z rachunkaŭ dakładna nie varta — jon dahetul vypuskaje chity, jakija źbirajuć miljony prahladaŭ.

17 miesca. ŁSP — Jesť dieńhi niet čuvstv (aściarožna: maciuki)

U videa Aleh ŁSP vystupaje ŭ roli treniera dla tych, chto choča dasiahnuć pośpiechu ŭ žyćci. Sens jahonych treninhaŭ supadaje z nazvaj treka: jość hrošy — niama pačućciaŭ. I tady ŭsio nibyta budzie dobra, ale ci ŭ hrošach ščaście?

16 miesca. Źmicier Vajciuškievič — Žuk i žołud

Videa na pieśniu ź dziciačaha alboma «Viasiołka nad plosam». Heta muzyčny prajekt na vieršy paeta Alaksieja Pysina, u jakim, aprača Vajciuškieviča, uziali ŭdzieł Lavon Volski, Śviatłana Bień, Naviband, Hanna Šarkunova i inšyja viadomyja vykanaŭcy.

Malavaŭ klip Andruś Takindanh, a animacyju zrabiŭ Dzianis Mižuj.

15 miesca. Vinsent — Kosmas

Sioleta viadomy biełaruski repier viarnuŭsia z klipam na novuju pieśniu «Kosmas», jakuju pryśviaciŭ «našym ludziam, našamu vialikamu lubimamu narodu», jaki zmahajecca za svaju budučyniu.

14 miesca. IOWA — Brosaj

Klip IOWA — heta mini-film pra sproby viarnuć źnikłaje kachańnie.

U niedalekim budučym małady čałaviek u łabaratoryi stvaraje kłonaŭ svajoj kachanaj, jakich sprabuje navučyć budzionnym rečam: pakazvaje staryja roliki, na jakich jany špacyrujuć i całujucca. Ale robat pačynaje płakać i łamajecca. I tak pa novaj.

13 miesca. ZVONKU — BRATKA

U klipie hurta, jaki raniej nazyvaŭsia Zanzibar i vystupaŭ u bałakłavach, źniaŭsia adzin z najlepšych maładych biełaruskich akcioraŭ Dźmitryj Davidovič. 

«Muzyčny adkaz i refleksija na tyja padziei i kryzis, u jakim apynułasia hramadstva», — tak ścipła muzykanty apisvajuć svaju rabotu.

12 miesca. DLINA VOLNY — Tomorrow

Małady hurt, jaki nie asabliva viadomy ŭ Biełarusi, sioleta vypuściŭ albom na amierykanskim łejble i źniaŭ nie adzin jakasny pryhožy klip. DLINA VOLNY — adzinyja ŭ našym čarcie, chto trapiŭ u jaho dvojčy. Napieradzie vas čakaje jašče adno videa ad minskaj kamandy.

11 miesca. Weed & Dolphins — Anchor Chain

Tut padobnaja historyja: kłaŭd-panki ź Minska nie tak viadomyja na radzimie, jak u Zachodniaj Jeŭropie, dzie jany časta dajuć kancerty. 

Hałoŭny hieroj videa śpiavaje, skavany łancuhami, jakimi kiruje tajamničy delfin, hałoŭny simvał hurta. A vakoł tancujuć ludzi pad hitarnyja ryfy.

Darečy, videa źniata na mabilny telefon Samsung.

10 miesca. Shuma — Kusta

«Pošuk harmonii zaŭsiody źviartaje naš pozirk unutry siabie. Da stvaralnaha žanočaha pačatku i mužčynskaha, što ruchaje da novaha. Matyŭ šlachu, jaki niepaduładny času, i pieraradžeńnia znajšoŭ adlustravańnie ŭ vizualnym rašeńni klipa», — tak apisvała videa, darečy, taksama źniataje na telefon, vakalistka elektronnaha kalektyva Rusia.

9 miesca. Jelena ŽiełudOk — Dziekać i ciekać

Z hetaj pieśniaj vykanaŭca kultavaj «Ščučynščyny» źbirałasia pajechać na «Jeŭrabačańnie». Ale, zamiest humarystyčnaj hieraini, ad Biełarusi ledź nie pajechali fryki z «Hałasoŭ ZMiesta».

Na ščaście, abiedźvie pieśni baranavickaha hurta zabanili. Na mižnarodny konkurs ad Biełarusi nichto nie pajedzie i ŭ 2022 hodzie.

8 miesca. Lisa — Rozarium

Klip maładoj śpiavački dakładna nie pakinie nikoha abyjakavym. Heta videa pra moc i pryhažość žančyny na fonie histaryčnych miescaŭ Biełarusi.

Kali Lisa raskazvała pra svoj albom, to hetuju pieśniu nazvała najbolš sumnaj i čullivaj.

7 miesca. J:MORS — Byvaj

Naprykancy hoda J:MORS vypuściŭ sientymientalny klip pra sumnuju rečaisnaść, pra adjezd ź Biełarusi darahich i blizkich ludziej, jakich z kožnym dniom stanovicca ŭsio bolš.

«Sumuju. Vielmi. Pa tych z vas, chto byŭ pobač amal štodnia. Pa tych, z kim bačylisia redka, ale dastatkova było viedać, što my ŭ adnym horadzie, u adnoj krainie, a, značyć, usio norm, usio, jak maje być», — napisaŭ pra premjeru Uładzimir Puhač.

6 miesca. Lavon Volski & Marharyta Laŭčuk — PAŁON

U animavanym klipie mastačka Marharyta Cichanovič adlustravała ceły śviet, u jakim ciapier žyvie šmat biełarusaŭ. Takoj atrymałasia novaja traktoŭka viadomaj pieśni «Pałon».

5 miesca. DLINA VOLNY — Bipolar

Samy załajkany kamientar pad rolikam možna pierakłaści tak: «Heta idealna dla tancaŭ u pakoi z adklučanym śviatłom i na poŭnaj hučnaści, dumajučy pra žyćcio». Lepš, vidać, i nie apišaš.

4 miesca. Molchat Doma — Otveta Net

«Heta klip-prytča pra čałavieka, jaki hłyboka pieražyvaje razryŭ stasunkaŭ i praciahvaje ciahnuć za saboj toje, što bolš nie maje dačynieńnia da jaho budučyni. Jon marnuje apošnija siły, kab dać kachańniu vyžyć, — siły, jakich u jaho amal nie zastałosia navat na ŭłasnaje žyćcio», — tak apisała klip jaho režysiorka Ira Roka.

Minskija hurt trymaje kłas: jahonyja klipy apošnija try hady stabilna ŭvachodziać u naš top i nižej čaćviortaha miesca nie apuskajucca.

3 miesca. TryNici — Carkoŭka

Klip na pieśniu supierhurta (tak u muzycy nazyvajuć kalektyŭ, u jaki ŭvachodziać vykanaŭcy, jakija stali viadomymi ŭ inšych hurtach) TryNici na kupalskuju pieśniu musiŭ vyjści jašče minułym letam, ale padziei ŭ Biełarusi pieraškodzili relizu.

Zdymki klipa adbyvalisia ŭ nievierahodna pryhožych miaścinach Viciebskaj vobłaści. Paŭtaryć ich budzie časova niemahčyma, bo dvoje z troch udzielnikaŭ hurta znachodziacca za miažoj.

2 miesca. NAKA — Iznutri

Balučaje ŭ svajoj realistyčnaści videa. Šeraść, bieznajdzienaść i adsutnaść čahości dobraha.

NAKA ŭ svaim videa sprabuje prahavaryć vialiki bol, ź jakim žyvuć biełarusy. Jon nie cišeje, a pierachodzić z adnaho vida ŭ inšy.

Hurt zaklikaje ŭ novym hodzie dziejničać, być mocnymi i salidarnymi jak nikoli.

1 miesca. Intelligency — Malitva Belaruskaja

Pieršy radok zajmaje jašče adno videa pra našu realnaść, ale ŭ farmacie strašnaj kazki. Jana bahataja inšaskazańniami ŭ siurrealistyčnych dekaracyjach. 

Intelligency pieraasensavali ideju tradycyjnaj batlejki i napoŭnili jaje novymi mietafarami i simvałami.

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera