The Wall Street Journal: ZŠA hatovyja prypynić sankcyi adnosna biełaruskaha kaliju ŭzamien za zhodu Biełarusi na tranzit ukrainskaha zbožža ŭ Kłajpiedu
Heta nie zdymaje patreby debłakady čarnamorskich partoŭ, bo biełaruski i polski čyhunačnyja šlachi tranzitu razam zdolnyja zabiaśpiečyć tolki 10% ukrainskaha charčovaha ekspartu. Biez ukrainskaj sielhaspradukcyi krainam Treciaha Śvietu pahražaje hoład.
Hienieralny sakratar AAN Antoniu Hutjereš i dziaržsakratar ZŠA Entani Blinkien na pasiadžeńni Rady biaśpieki AAN 19 maja. Fota JOHN MINCHILLO/ASSOCIATED PRESS
Tema ekspartu ŭkrainskaha zbožža stała ŭ čaćvier pradmietam dyskusii ŭ Radzie biaśpieki AAN. U adkrytych sprečkach asabista ŭziali ŭdzieł hienieralny sakratar AAN Antoniu Huteryš i dziaržaŭny sakratar ZŠA Entani Blinkien.
Vajna, błakada Rasijaj čarnamorskich portaŭ i rakietnyja ŭdary pa ŭkrainskaj čyhunačnaj infrastruktury zabłakavali pastaŭki na rynki ŭkrainskaha zbožža i aleju. Heta nie tolki pakinuła Kijeŭ biez krynic dachodaŭ, ale i pahražaje hoładam dziasiatkam miljonam ludziej u Azii i Afryki, što patencyjna moža pryvieści da łancuha palityčnych uzrušeńniaŭ i humanitarnych katastrof.
Va ŭkrainskich zierniaschoviščach zavisła 20 miljonaŭ ton zbožža. Bieź jaho ceny na pradukty charčavańnia vyrastuć. Dla nasielnictva krain Zachadu heta nie krytyčna, ale rost cenaŭ na ježu ŭ takich krainach, jak Jehipiet, Maroka, Šry-Łanka, Pakistan dy h.d. moža pryvieści da kryzisu, chvali jakoha dakaciacca daloka.
«My pracujem nad dasiahnieńniem takoha pakietnaha pahadnieńnia, jakoje dazvolić ekspart sielhaspradukcyi Ukrainaj nie tolki čyhunačnym šlacham, ale i praz Čornaje mora, i vyviedzie rasijskija pradukty charčavańnia i ŭhnajeńni na suśvietnyja rynki biez usiakich abmiežavańniaŭ», — paviedamiŭ Huteryš u čaćvier.
Adnak dypłamaty kažuć, što Rasija nie idzie na sutnasny kantakt u pytańni debłakady čarnamorskaha ŭźbiarežža Ukrainy.
Voś čamu ŭčora Vašynhton razhladaje pytańnie pastaŭki Ukrainie amierykanskich supraćkarabielnych rakiet «Harpun» dy inšych uzbrajeńniaŭ, jakija dazvolili b ukraincam rasčyścić marskija šlachi da Adesy. Adnačasova ŭčora stała viadoma, što Francyja raźmieścić u rajonie Kanstancy ŭ Rumynii supraćpavietrany kompleks «Mamba» radyusam dziejańnia kala 100 km.
Adnačasova ŭłady ZŠA razhladajuć tranzit ukrainskaha zbožža praź Biełaruś jak alternatyvu. Ułady ZŠA prapanujuć prypynić na paŭhoda sankcyi suprać biełaruskaha kalijnaha siektara, kali Minsk pahodzicca na tranzit ukrainskaha zbožža praz svaju terytoryju, paviedamlaje The Wall Street Journal.
Ideja zaklučajecca ŭ pieravozcy zbožža z Ukrainy čyhunkaj praź Biełaruś da porta ŭ horadzie Kłajpieda (Litva).
Zachodnija krainy ŭnieśli ŭ sankcyjny śpis kampaniju «Biełaruśkalij» — adnaho z najbujniejšych vytvorcaŭ kalijnych uhnajeńniaŭ u śviecie — u 2021 hodzie, u adkaz na fašyzacyju režymu ŭ Biełarusi i sproby destabilizavać jeŭrapiejskija krainy zasyłkaj mihrantaŭ. Paźniej pad abmiežavańni trapiła i «Biełaruskaja kalijnaja kampanija» (BKK). Adnak realna sankcyi suprać biełaruskaha kaliju zapracavali tolki ŭ lutym 2022 hoda, kali Litva spyniła tranzit hetaj syraviny, što zakryła jaje šlach na rynki. I heta samyja balučyja sankcyi, jakija kali-kolviek uvodzilisia suprać łukašenkaŭcaŭ.
«Uoł-stryt džornał» adznačaje, što biełaruskaha šlachu, adnak, niedastatkova dla pieravozki tych vializnych abjomaŭ zbožža, što ekspartuje Ukraina, jakaja apošnija hady źbiraje ahromnyja ŭradžai. Ujavicie sabie, što Ukraina ŭ 2021 hodzie sabrała kala 107 miljonaŭ ton zbožža proci prykładna 7 młn ton, jakija sabrała Biełaruś.
Pa čyhuncy možna budzie pieravieźci tolki 10% davajennych ekspartnych abjomaŭ pastavak z Ukrainy, pryvodzić vydańnie dumku Sary Mienkier, kiraŭnika adździeła sielskahaspadarčaj analityki kampanii Gro Intelligence. «Hetaha niedastatkova», — skazała jana na pasiadžeńni Rady biaśpieki, kudy jaje zaprasili ŭ jakaści ekśpierta.
Čynoŭniki AAN taksama ličać, što viartańnie biełaruskaha i rasijskaha kaliju na rynak važnaje dla zachavańnia ŭradžajnaści ŭ roznych krainach płaniety. Zachodnija krainy zajaŭlajuć, što sankcyi suprać Rasii nie zakranajuć uhnajeńniaŭ, sielhaspradukcyi dy inšych śfier, jakija majuć charčovaje i humanitarnaje značeńnie.
Prypynieńnie sankcyj na kalij uzamien na tranzit zbožža stała b pieršym krokam pa deeskałacyi adnosin miž Biełaruśsiu i Zachadam. U toj ža čas admiena sankcyj na pastaŭki kaliju dała b Minsku krynicu valuty, va ŭmovach kali ŭ sakaviku i krasaviku padzieńnie VUP proci ŭzroŭniu 2021 hoda pad upłyvam sankcyj i straty ŭkrainskaha rynku skłała kala 5%. Źniaćcio sankcyj ujaŭlaje dla krain Zachadu taksama maralnaje pytańnie. Situacyja z pravami čałavieka ŭ Biełarusi nie palepšała, fašyzacyja režymu praciahvajecca, i Biełaruś nadała svaju terytoryju dla ahresii suprać Ukrainy. Z druhoha boku šalaŭ — patreba Ukrainy ekspartavać zbožža.
