Prysud Jahoru Marcinoviču i Andreju Skurko pakinuli ŭ sile
Siońnia Minski haradski sud razhledzieŭ apielacyju na prysud našaniŭcam. Jon zastajecca ŭ sile: dva z pałovaj hady kałonii.
Jahora Marcinoviča i Andreja Skurko zatrymali 8 lipienia 2021 hoda.
Kryminalnuju spravu suprać ich siłaviki zaviali pavodle č. 2 art. 216 Kryminalnaha kodeksa (pryčynieńnie majomasnaj škody biez prykmiet kradziažu, učynienaje hrupaj asobaŭ pa papiaredniaj zmovie abo ŭ bujnym pamiery). Našaniŭcaŭ sudzili pa ekanamičnym artykule za apłatu kamunalnych pasłuh pa taryfach dla fizičnych, a nie jurydyčnych asob.
Pieršapačatkova škodu naličyli ŭ pamiery 3500 rubloŭ. Potym hetaja suma vyrasła da 10 tysiač. Našy kalehi pahasili škodu da suda, «Minskvodakanał» i «Minskenierha» adklikali iski.
Sud pačaŭsia 28 lutaha 2022 hoda, a prysud byŭ vyniesieny 15 sakavika. Ciapier našaniŭcy znachodziacca ŭ turmie ŭ Mahilovie.
