U roznych haradach zakryvajucca «azijackija» kramy tannaha adzieńnia
U Słucku i Hancavičach začynilisia niekatoryja «azijackija» kramy z tannym adzieńniem i abutkam. Vierahodna, pra zakryćcio hetaj sietki z 240 kram raspaviadaŭ učora dziaržkantrol.
Jak piša Kurjer.info, u Słucku na vulicy Lenina zakryłasia krama «Śmiešnyja ceny», na Maksima Bahdanoviča — «Śviet adzieńnia i abutku», u novaj kramie na 14 Partyzan demantujuć handlovaje abstalavańnie.
Usie hetyja kramy (u narodzie ich nazyvajuć «azijackija») pradavali tannaje adzieńnie i abutak.
Jak vyśvietliŭ «Kurjer», padatkovaja inśpiekcyja pracuje z hetymi kramami, «pravodzić administracyjnyja pracedury».
Pradaŭcy słuckich «azijackich» kram, ź jakimi ŭdałosia pierahavaryć, skazali, što ich nie zvolnili, a skazali pakul pačakać.
Jość prablemy ŭ kramach tannych tavaraŭ i ŭ inšych haradach Biełarusi. Naprykład, u Hancavičach taksama začyniłasia niekalki paviljonaŭ. Miascovyja žurnalisty pišuć, što rabotnikaŭ hetych kramaŭ, hetak ža, jak i słuččan, pakul nie zvolnili.
«Hancavicki čas» raspaviadaje, što pieršy «azijacki» paviljon zjaviŭsia ŭ Hancavičach u 2017 hodzie. Prykładna z 2016 hoda mahaziny nizkich koštaŭ stali źjaŭlacca pa ŭsioj krainie.
Fota: «Hancavicki čas»
Najpierš jany stali kankurentami dla pradprymalnikaŭ z rynkaŭ, jakija nieadnojčy stavili pierad MARH pytańnie pra niadobrasumlennuju kankurencyju.
Jašče ŭ studzieni 2018 hoda ŭ Ministerstvie antymanapolnaha rehulavańnia i handlu prajšła sustreča, na jakoj pradprymalniki z udziełam ministra Uładzimira Kałtoviča abmierkavali prablemy kramaŭ, adkrytych u Biełarusi handlarami z krain Centralnaj Azii.
Pradprymalniki kazali, što biez parušeńnia zakona handlavać pa takich nizkich cenach niemahčyma. Pavodle ŭdzielnika sustrečy ź ministram, lidara pradprymalnickaj arhanizacyi «Pierśpiektyva» Anatola Šumčanki, «zaniepakoilisia narešcie i dziaržaŭnyja čynoŭniki».
Ale kramy praciahvali pracavać.
