Spravu ab dziaržaŭnaj zdradzie Viktara Miedźviedčuka pieradali ŭ sud
Dziaržaŭnaje biuro rasśledavańniaŭ Ukrainy zaviaršyła dasudovaje rasśledavańnie kryminalnaj spravy pa padazreńni ŭ dziaržaŭnaj zdradzie narodnaha deputata Viktara Miedźviedčuka. Ofis hienprakurora nakiravaŭ abvinavaŭčy akt u sud. Pra heta havorycca ŭ zajavach DBR i Ofisa hienprakurora.
Pa viersii śledstva, Miedźviadčuk dapamahaŭ Rasii ŭ viadzieńni infarmacyjnaj vajny suprać Ukrainy i kansultavaŭ pa raspaŭsiudžvańni siarod ukraincaŭ rasijskich naratyvaŭ.
Taksama śledčyja orhany padazrajuć, što Miedźviadčuk pieradaŭ Rasii infarmacyju ab raźmiaščeńni sakretnaha padraździaleńnia Minabarony Ukrainy.
Akramia taho, śledstva vyjaviła, što abvinavačany deputat na praciahu 2015—2020 hadoŭ dapamahaŭ pradstaŭnikam krainy-ahresara ŭ praviadzieńni padryŭnoj dziejnaści suprać Ukrainy. A ŭ 2015 hodzie, pa źviestkach prakuroraŭ, Miedźviadčuk spryjaŭ RF u razrabavańni nacyjanalnych kaštoŭnaściaŭ u Krymie: jon pieradaŭ źviestki i dakumienty dla niezakonnaj zdabyčy nafty i hazu na Prykierčanskim šelfie Čornaha mora ŭ vyklučnaj (marskoj) ekanamičnaj zonie Ukrainy. Resursy hetaha radovišča kaštujuć bolš za 38 miljardaŭ hryŭniaŭ.
Abvinavaŭčy akt suprać narodnaha deputata nakiravali ŭ sud. Jamu pahražaje da 15 hadoŭ pazbaŭleńnia voli z mahčymaj kanfiskacyjaj majomaści.
Miedźviadčuk — kum Uładzimira Pucina, adzin z hałoŭnych prarasijskich palitykaŭ Ukrainy. U lutym jon uciok z-pad chatniaha aryštu, na jaki jaho pasadzili ŭ 2021 hodzie. 12 krasavika było paviedamlena, što jon zatrymany.
