ZŠA mohuć dazvolić dźvium kampanijam pastaŭlać vieniesuelskuju naftu ŭ Jeŭropu
Štaty mohuć dać dazvoł italjanskaj Eni SpA i ispanskaj Repsol SA na pastaŭku nafty ź Vieniesueły ŭ Jeŭropu, piša Reuters. Mahčyma, heta adbudziecca ŭžo ŭ lipieni i dapamoža kampiensavać rasijskuju naftu.
Dziaržaŭny departamient ZŠA daŭ dazvoł na adnaŭleńnie pastavak nafty ź Vieniesueły dźvium kampanijam. Abjomy, mierkavana, buduć nievialikija i praktyčna nie paŭpłyvajuć na hłabalnyja ceny na naftu.
Enierhietyčnyja kampanii, u jakich jość sumiesnyja pradpryjemstvy ź vieniesuelskaj dziaržaŭnaj naftavaj kampanijaj PDVSA, mohuć zaličyć pastaŭki syroj nafty ŭ košt nieapłačanych daŭhoŭ i praterminavanych dyvidendaŭ.
Klučavoj umovaj, sa słoŭ adnaho z surazmoŭcaŭ Reuters, było toje, što atrymanaja nafta «pavinna pastupać u Jeŭropu, jaje nielha pierapradać u inšym miescy».
Administracyja prezidenta ZŠA Džo Bajdena spadziajecca, što vieniesuelskaja nafta dapamoža Jeŭropie źnizić zaležnaść ad Rasii i pieranakiravać častku vieniesuelskich hruzaŭ z Kitaja. Uhavaryć Madura adnavić palityčnyja pieramovy z apazicyjaj Vieniesueły — jašče adna meta.
