«Chaču być pobač z mamaj i tatam i svabodna dychać»: Safija Sapieha paprasiła Łukašenku ab pamiłavańni
Sapieha adbyvaje šaścihadovy termin u kałonii za administravańnie apazicyjnaha telehram-kanała «Čornaja kniha Biełarusi».
22 červienia jana pieradała chadajnictva ab pamiłavańni ŭ administracyju kałonii VK-4 U Homieli, kudy jaje pieraviali ź SIZA try tydni tamu, raspavioŭ advakat siamji asudžanaj Anton Hašynski, piša Bi-bi-si.
U zvarocie 24-hadovaja źniavolenaja prosić Łukašenku vyzvalić jaje ad adbyćcia šaścihadovaha terminu abo zamianić jaho bolš miakkim pakarańniem.
«Ja tolki chaču być pobač sa svajoj siamjoj… ja chaču svabodna dychać…», — havorycca ŭ chadajnictvie.
U im rasijanka taksama prosić biełaruskaha kiraŭnika prajavić spahadu i pavieryć u jaje vypraŭleńnie, dać joj šaniec «na toje, kab być karysnaj hramadstvu, i być pobač sa svajoj mamaj i tatam».
Farmalnaj prablemaj dla pamiłavańnia rasijanki ciapier zastajecca niavypłačanaja častka nazvanaj u prysudzie sumy.
Padčas śledstva sud aryštavaŭ kanfiskavanyja ŭ Sapiehi 15,4 tysiač biełaruskich rubloŭ i 11 tysiač rasijskich rubloŭ (371 biełaruski rubiel), jakija achviaravali paśla prysudu na jaje karyść dabračyncy.
Hetyja hrošy pojduć na pahašeńnie toj sumy, jakuju Sapieha pavinna vypłacić u jakaści kampiensacyi maralnaj škody «paciarpiełym» čynoŭnikam, i dziaržpošliny, vynikaje ź jaje chadajnictva. Takim čynam, na dadzieny momant jaje doŭh składaje kala 160 tysiač biełaruskich rubloŭ.
Baćki Sofji płanavali pradać svaju kvateru ŭ Lidzie, dzie adbyvała chatni aryšt Sofja. Ale hetyja hrošy nie pakryjuć uvieś štraf. «Dačka prasiła prabačeńnia za toje, što pryniesła nam stolki bolu. Ale my siamja — u kožnaj siamji byvaje biada», — kazała Bi-bi-si maci źniavolenaj Hanna Dudzič.
U Pałažeńni ab paradku pamiłavańnia ŭ Biełarusi havorycca, što pry razhladzie chadajnictva asudžanaha prymajecca pad uvahu ŭ tym liku pakryćcio škody, naniesienaj złačynstvam. Raniej advakat Hašynski kazaŭ, što dla pamiłavańnia nieabchodna pahasić usiu pakazanuju ŭ prysudzie sumu. Sapieha piša ŭ prašeńni, što «na siońniašni dzień» ni ŭ jaje, ni ŭ jaje baćkoŭ niama hrošaj, kab pahasić uvieś doŭh. Ale jana «nie składaje ź siabie abaviazku» vypłacić doŭh paciarpiełym.
Da chadajnictva prykładzieny asabistyja paručycielstvy. Chto mienavita paručyŭsia za Sapiehu, abarona nie raskryvaje. U vypadku ździajśnieńnia paśla pamiłavańnia novaha złačynstva z paručyciela mohuć spahnać da 16 tysiač rubloŭ.
Chadajnictva asudžanaj administracyja kałonii pavinna nakiravać u Kamisiju pa pamiłavańni. U vypadku jaho adchileńnia, jana zmoža paŭtorna prasić ab pamiłavańni praz paŭhoda.
Alaksandr Łukašenka 3 červienia zajaviŭ žurnalistam, što Sapiehu mahčyma pieradać Rasii. «Škada dziaŭčynku. Treba heta pytańnie vyrašać», cytavali jaho słovy biełaruskija ŚMI. «Jana ž rasijanka… U nas jość praktyka. My možam rasijskaha hramadzianina pieradać u Rasiju. Niachaj jana tam adbyvaje termin. Ci jany što chočuć, tam robiać. Dumaju, dla jaje vialikaja navuka», — kazaŭ jon.
Safiju Sapiehu zatrymali razam z Ramanam Pratasievičam 23 maja 2021 hoda ŭ vyniku prymusovaj pasadki ŭ Minsku rejsu Afiny — Vilnia.
