«Virus nikudy nie dzieŭsia». Novuju chvalu kavidu ŭ Biełarusi možna čakać u kancy leta
Karanavirus praciahvaje pradstaŭlać niebiaśpieku, choć ciapier zachvorvalnaść nievysokaja. Adnak novuju chvalu ŭ Biełarusi možna čakać užo ŭ kancy leta. Pra heta na pres-kanfierencyi ŭ Nacyjanalnym pres-centry zajaviŭ zahadčyk kafiedry infiekcyjnych chvarob i dziciačych infiekcyj Biełaruskaj dziaržaŭnaj akademii paśladypłomnaj adukacyi Juryj Horbič, piša Reform.by.
Juryj Horbič. Skrynšot videa pres-kanfierencyi
«Virus nikudy nie dzieŭsia. Jon jość. Jość pacyjenty, jakija chvarejuć na hety momant. Jość pacyjenty, jakija znachodziacca ŭ stacyjanary. Jość pacyjenty, jakija atrymlivajuć kisłarod. Jość pacyjenty, jakija znachodziacca ŭ adździaleńniach reanimacyi i intensiŭnaj terapii. Tak, pa paraŭnańni z tym, jak heta było na pikach usich chval, ciapier adnosna dobra, nazaviom heta tak. To-bok vierahodnaść atrymać jaho, dastatkova nizkaja», — skazaŭ jon.
Na dumku Horbiča, ciapier usie faktary, jakija ŭpłyvajuć na raspaŭsiudžvańnie infiekcyi, pracujuć na čałavieka. Havorka idzie pra dačny siezon, spynieńnie zaniatkaŭ u škołach i VNU. Razam z tym, varta čakać, što ŭ kancy žniŭnia abo na pačatku vieraśnia pačniecca čarhovaja chvala zachvorvańnia. Jon adznačyŭ, što ŭzdym zachvorvalnaści ŭžo adznačajecca ŭ ZŠA. Štodnia rehistrujecca 100 tysiač chvorych i kala 30 tysiač špitalizavanych.
«Praŭda, na naša vialikaje ščaście, śmiarotnaść na hetyja 30 tysiač špitalizavanych składaje 300-350 čałaviek na dzień, heta značyć, heta składaje adnu dziasiatuju ad toj śmiarotnaści, jakaja była na studzień 2021 hoda», — adznačyŭ Horbič.
Jon adznačyŭ, što ŭ ZŠA pry hetym cyrkulujuć dva novyja varyjanty «amikrona», jakich jašče niama ŭ Biełarusi.
«Dyspraparcyjna ciažka i dyspraparcyjna šmat śmiarotnych zychodaŭ u hrupach ludziej, starejšych za 65 hadoŭ», — skazaŭ jon.
Śpiecyjalist padkreśliŭ, što ŭ Biełarusi ciapier taksama siarod ciažkich chvorych pieravažajuć pacyjenty hetaj ža ŭzrostavaj katehoryi, pry hetym nievakcynavanyja. Horbič padkreśliŭ, što pieraniesienaje zachvorvańnie nie daje taho ž imunitetu, što i vakcynacyja, jakaja taksama abaraniaje ŭ bolšaści vypadkaŭ ad ciažkaha ciačeńnia i śmiarotnych zychodaŭ. Taksama niebiaśpiečnym karanavirus zastajecca dla ludziej z chraničnymi zachvorvańniami.
Juryj Horbič na fonie hetych danych padkreślivaje važnaść vakcynacyi, u tym liku atrymańnie bustarnaj dozy.