G7 vykazała zakłapočanaść nakont pieradačy Biełarusi jadziernaj zbroi
U G7 surjozna zaniepakojenyja abiacańniami Rasii pieradać Biełarusi rakiety ź jadziernym patencyjałam. Pra heta havorycca ŭ sumiesnaj zajavie lidaraŭ krain «Vialikaj siamiorki» (Vialikabrytanii, Hiermanii, Italii, Kanady, ZŠA, Francyi i Japonii) pa Ukrainie.
Fota: Smartpress.by
U zajavie vykazvajecca asudžeńnie ahresii Rasii, jakaja ažyćciaŭlajecca pry padtrymcy Biełarusi.
«My pa-raniejšamu ŭzrušanyja i praciahvajem asudžać žorstkuju, niespravakavanuju, nieapraŭdanuju i niezakonnuju ahresiju suprać Ukrainy z boku Rasii pry padtrymcy Biełarusi. My asudžajem i nie pryznajom sproby Rasii pierakroić miežy siłaj», — havorycca ŭ zajavie.
Lidary G7 vykazali zakłapočanaść namierami Rasii pieradać Biełarusi i rakiety ź jadziernym patencyjałam.
«My znoŭ zajaŭlajem pra naša asudžeńnie nieapraŭdanaha vykarystańnia Rasijaj jadziernaj rytoryki i sihnałaŭ. Rasija pavinna vykonvać svaje mižnarodnyja abaviazacielstvy, u tym liku tyja, jakija zabaraniajuć užyvańnie chimičnaj, bijałahičnaj abo jadziernaj zbroi. My zaklikajem Rasiju pavodzić siabie adkazna i prajaŭlać strymanaść i znoŭ zajaŭlajem, što luboje prymianieńnie takoj zbroi było b nieprymalnym i paciahnuła b za saboj ciažkija nastupstvy. U hetaj suviazi vykazvajem surjoznuju zakłapočanaść paśla zajavy Rasii pra mahčymuju pieradaču Biełarusi rakiet ź jadziernym patencyjałam», — havorycca ŭ zajavie.
Pra mahčymaść pieradačy Biełarusi rakietnych kompleksaŭ «Iskander-M», jakija mohuć prymianiać balistyčnyja i kryłatyja rakiety, skazaŭ Uładzimir Pucin na sustrečy z Łukašenkam 25 červienia.
«Jak my z vami i damaŭlalisia, vy stavili pytańnie pra heta, rašeńnie ŭ nas pryniataje. My ciaham najbližejšych miesiacaŭ pieradadzim Biełarusi rakietna-taktyčnyja kompleksy «Iskander-M», jakija, jak viadoma, mohuć prymianiać jak balistyčnyja, tak i kryłatyja rakiety, pryčym jak u zvyčajnym, tak i jadziernym vykanańni», — skazaŭ u subotu Pucin.
