«Čałaviek suprać pčały» — Roŭen Atkinsan sprabuje pakaryć Netflix, i vychodzić nasamreč śmiešna
Uvieś śviet viedaje Roŭena Atkinsana jak majstra kamiedyi. Ale kali vy i nie raśli na filmach pra mistara Bina, usio roŭna pahladzicie novuju stužku ad brytanca, stvoranuju razam z Netflix. «Čałaviek suprać pčały» (Man vs Bee) atrymaŭsia dynamičnym, u mieru śmiešnym i sapraŭdy zachaplalnym sieryjałam.
Fota: NETFLIX
U centry historyi — Trevar Binhli (Atkinsan), novy supracoŭnik kampanii House Sitter Deluxe. Jon dahladaje za šykoŭnaj viłaj, abstaŭlenaj kaštoŭnymi tvorami mastactva i najlepšaj technikaj, pakul haspadary viły znachodziacca ŭ adjeździe. Padčas takoj adkaznaj pracy ŭ Trevara ŭźnikaje prablema: u dom zalataje pčała, jakaja pieraškadžaje mužčynie spakojna vykonvać svaje abaviazki, piša leisurebyte.com.
Trevar nie zdajecca i sprabuje pazbavicca ad pčały. Jon chavaje jaje pad stakan, starajecca vyhnać na vulicu i robić šmat inšaha, što škodzić nie pčale, a chatnim žyviołam, majomaści i kaštoŭnym rečam. U toj ža čas hetaja praca — adzinaja mahčymaść dla Trevara vyvieźci svaju dačku na adpačynak. Chto ž pieramoža ŭ bitvie čałavieka dy pčały?
U Atkinsana dy Netflix atrymaŭsia sieryjał, napoŭnieny žyćciovymi ŭrokami. Voś niekatoryja ź ich:
- nie spadziavajciesia złavić pčału ŭ vialikaje pijanina,
- pčoły znachodziacca pad pahrozaj źniknieńnia, tamu nie razahravajcie ich u mikrachvaloŭcy,
- kali vy śpiašajeciesia da vieterynara z sabakam u komie, nie zdymajcie abutak u mašynie, kab prystuknuć im pčału,
- kali vy źniščyli kaštoŭnuju karcinu, pakul staralisia prybić pčału, nie pierafarboŭvajcie čyrvonuju plamu tamatnym sousam — heta nikoha nie padmanie,
- toje ž datyčycca vykarystańnia starych kampakt-dyskaŭ i frahmientaŭ rułonnych štor, kab adnavić tvor Kandynskaha, jaki paciarpieŭ ad tenisnaj rakietki.
Jość mierkavańnie, što sapraŭdnaja kamiedyja — heta trahiedyja plus čas. Ale stvaralniki «Čałavieka suprać pčały» dajuć bolš efiektyŭnuju formułu: rečy plus idyjot. Sieryjał z takim ža pośpiecham možna było b nazvać «Čałaviek suprać doma» ci «Čałaviek suprać siabie». Hieroja Atkinsana zvolnili z supiermarkieta paśla «kanfliktu» z vazkom dla praduktaŭ, a z ofisa — paśla «svarki» sa šredaram. Naŭrad ci hety mužčyna — idealny kandydat, kab dahladać za domam z hałasavymi sistemami biaśpieki, instrukcyja da jakoha takaja toŭstaja, što joj samoj možna zmahacca z pčołami.
«Čałaviek suprać pčały» — heta viasioły sieryjał, ad jakoha moža atrymać asałodu ŭsia siamja. Roŭen Atkinsan — čałaviek, jaki zarekamiendavaŭ siabie jak kamiedyjny akcior, i ŭ roli Trevara Binhli jon vas nie rasčaruje. Mahčyma, sam sieryjał moža zdavacca trochi chaatyčnym, ale zakančeńnie vas pryjemna ździvić.
Stužka časam vyhladaje trochi durnoj i dziciačaj, ale, mahčyma, u hetym i jość jaje sutnaść. «Čałaviek suprać pčały» — nie toj tvor, jaki treba padrabiazna analizavać, heta chutčej prosta ekscentryčnaja kamiedyja, jakaja časam moža nie mieć anijakaha sensu, ale pry hetym zabaŭlaje i nie niasie škody hledačam.
Rejtynhi na vialikich suśvietnych resursach:
IMDB — 7/10
Rotten Tomatoes — 58%
«Stary» — siamisieryjny detektyŭny tryler z zornym składam. Krytyki ŭ zachapleńni
Što pahladzieć. «Siadaj za rul majoj mašyny» — najlepšy zamiežny film «Oskara» 2022 hoda
