U Minsku ŭ 3,5 razu patańnieła termafutra na dom
Płacić 8,5 rubloŭ u miesiac zamiest 30 našmat kamfortniej dla siamiejnaha biudžetu
Minčanie ŭpieršyniu ŭsim domam finansava paŭdzielničali ŭ nabyćci termafutra, apłacili pałovu koštu prajekta, materyjałaŭ i rabot pa ciepłavoj madernizacyi, paviedamlaje belarus.kp.ru.
Nahadajem, što ŭ 2021 hodzie za hetaje novaŭviadzieńnie kamunalniki aktyŭna ahitavali žycharoŭ 341 doma, pahadzilisia tolki try. I pakul tolki adzin, piacipaviarchovik pa vuł.Kalinoŭskaha, 26, padčas kapramontu dajšoŭ da finału i «futram» abzavioŭsia.
Ciaham niekalkich hadoŭ, a było heta da 2016 hoda, «futra» na dom uvachodziła ŭ kapramont i asobna płacić za jaje žycharam nie davodziłasia. Potym z-za prablem ź finansavańniem ab «futry» pryjšłosia zabycca.
Ale ŭ śniežni 2019-ha ŭstupiŭ u siłu ŭkaz Łukašenki №327 «ab pavyšeńni enierhaefiektyŭnaści šmatkvaternych žyłych damoŭ», dzie znoŭ uzialisia za ciepłavuju madernizacyju. Ale ciapier 50% koštu z rasterminoŭkaj na 10 hadoŭ prapanavali apłacić ułaśnikam kvater, a 50% brali ź biudžetu.
Za 2,5 hoda ŭhavaryli na novuju pasłuhu žycharoŭ tolki 20 damoŭ pa ŭsioj Biełarusi. Vinoj tamu — cana. Košt pa Minsku z dvuchpakajovaj kvatery ŭ śniežni 2021 hoda ahučvaŭsia ŭ rajonie 30 rubloŭ u miesiac i tak 10 hadoŭ zapar (čym bolš kvatera pa płoščy, tym vyšejšy košt). Zhodu na madernizacyju pavinny dać dźvie traciny ŭłaśnikaŭ.
U vyniku pa schiemie 50 na 50 byŭ zrobleny pieršy dom u Minsku na Kalinoŭskaha, i košt upaŭ. Budaŭniča-mantažnyja raboty firma, jakaja vyjhrała tendar, praviała našmat tańniej raniej za mierkavanyja košty. Dla ŭładalnika dvuški ŭ 50 kvadrataŭ 8,5 rubla ŭ miesiac z rasterminoŭkaj na 10 hadoŭ i pa vyniku krychu bolš za 2 tysiačy rubloŭ. Pryčym abiacajuć, što 8,5 rubla — heta fiksavanaja suma, jakaja nie budzie źmianiacca z hadami.
Płanujecca, što žychary hetaha piacipaviarchovika adabjuć hetyja 8,5 rubla, tamu što buduć płacić za aciapleńnie na tracinu mienš zimoj. U siarednim aciapleńnie dvuški abychodziłasia ŭ 25 rubloŭ, a budzie ŭ 16. Termin akupnaści prajekta — 7 hadoŭ.
