Znajści
Ałharytmičny łacinski varyjant
07.07.2022 / 11:583RusŁacBieł

Borys Džonsan sychodzić u adstaŭku. Čamu zdaryŭsia brytanski kryzis

Spačatku suprać jaho paŭstali adnapartyjcy, a potym z karabla pabiehli ŭžo i najbližejšyja paplečniki — ministry jaho ŭrada. Hałoŭnaja pretenzija nie da vynikaŭ pracy ci kursu Kansiervatyŭnaj partyi, hałoŭnaja pretenzija asabista da premjera. Paplečniki nie prosta sumniavajucca ŭ jaho prystojnaści i sumlennaści — heta pravieranaja časam prablema Džonsana. Jany hublajuć nadzieju na toje, što jon kali-niebudź vypravicca, piša BBC.

Fota: AR

Paśla čarhovaha skandału ŭ aŭtorak dva ciažkavahaviki z kabinieta Džonsana — ministry finansaŭ i achovy zdaroŭja — hučna hruknuli dźviaryma. Skandał sam pa sabie mała adroźnivaŭsia ad papiarednich, i Džonsanu pradjavili nie za jaho, a pa sukupnaści.

Śledam u adstaŭku paciahnulisia pryznačency, nižejšyja ranham. U sieradu nie tolki apazicyja, ale i svaje ŭłasnyja deputaty zładzili Džonsanu raznos u parłamiencie i zapuścili praceduru votumu niedavieru.

Luby inšy premjer u brytanskaj tradycyi ŭžo daŭno pisaŭ by miemuary, adnak navat zahnany ŭ kut Džonsan akazaŭsia vierny sabie i spačatku naadrez admoviŭsia sychodzić.

«U takich ciažkich abstavinach i z takim kałasalnym mandatam rabota premjer-ministra — pracavać dalej. Hetym ja i maju namier zaniacca», — skazaŭ Džonsan u parłamiencie i śpisaŭ svaje prablemy na ekanamičnyja ciažkaści krainy i sproby zrabić ź jaho kazła adpuščeńnia.

Adnak lidar buntu na karabli Sadžyd Džavid, były ministr finansaŭ, a da ciapierašniaj adstaŭki — achovy zdaroŭja, skazaŭ, što sprava nie ŭ tym, jak Džonsan spraŭlajecca z rekordnym rostam cenaŭ, brekzitam, enierhietyčnym i inšymi kryzisami ŭ Vialikabrytanii.

Sprava ŭ samim Džonsanie.

«Hramadstva čakaje ad usich nas — ad usich nas — sumlennaści i pryncypovaści va ŭsim. Heta nie abstraktnaje pytańnie. […] Efiektyŭnaja dziejnaść urada patrabuje łajalnaści i kalektyŭnaj adkaznaści, viadoma, a ja instynktyŭna kamandny hulec i ŭ apošni hod ja całkam zasiarodziŭsia na efiektyŭnym kiravańni. Adnak u apošnija miesiacy ŭtrymacca na kanacie pamiž łajalnaściu i pryncypovaściu stała niemahčyma. Spadar śpikier, ja nikoli nie stanu ryzykavać svajoj pryncypovaściu», — zajaviŭ u parłamiencie Džavid.

«Ja vieru, što kamanda raŭniajecca na kapitana. Padziei apošnich miesiacaŭ zrabili rabotu ŭ hetaj kamandzie praktyčna niemahčymaj», — dadaŭ jon.

Čym nie dahadziŭ Džonsan

Zhadanyja «padziei» — heta čarada skandałaŭ, kožny ź jakich upiraŭsia ŭ toje, što Džonsan spačatku ŭsio admaŭlaŭ, a potym pryznavaŭ i prasiŭ prabačeńnia. Jaho vinavacili ŭ patałahičnaj chłuśni i žadańni luboj canoj utrymacca va ŭładzie.

Samym bujnym akazaŭsia skandał ź viečarynami ŭ rezidencyi Džonsana ŭ žorstki łakdaŭn i abvinavačvańniami ŭ tym, što premjer nieadnarazova kazaŭ niapraŭdu ŭ parłamiencie, a paśla źjaŭleńnia novych śviedčańniaŭ jaho chitraści spasyłaŭsia na drennuju pamiać ci pamyłku.

Tuju ž taktyku jon abraŭ u apošniaj historyi z členam jaho ŭrada, jakoha abvinavacili ŭ seksualnych damahańniach da dvuch mužčyn u zakrytym kłubie. Džonsanu pastavili ŭ vinu pryznačeńnie hetaha deputata na vysokuju pasadu nasupierak tamu, što toj užo byŭ zamiašany ŭ padobnaj historyi raniej.

Džonsan adkazaŭ, što ničoha takoha nie pamiataje, ale potym vyrašyŭ usio ž paprasić prabačeńnia — ale tolki kali źjavilisia nieabvieržnyja śviedčańni taho, što jamu dakładvali pra incydent asabista i navat kali jon zabyŭsia, jaho sakratar moh lohka padniać pratakoł toj sustrečy i nahadać.

«Uciakajuć ad pacuka»

«Skandały, amaralnyja pavodziny, pravały ŭ palitycy pryviali da taho, što ciapierašni ŭrad razvalvajecca na vačach», — skazaŭ lidar apazicyjnaj Lejbarysckaj partyi Kir Starmier i nie paškadavaŭ navat tych, chto ŭ vyniku ŭsio ž padaŭ u adstaŭku.

«Tyja, chto vyharodžvaŭ jaho ŭvieś hety čas, i tolki ciapier sychodziać — u ich niama ni kropli prystojnaści. Padobna, my majem spravu ź pieršym u historyi vypadkam, kali karabiel, jaki tonie, biažyć ad pacuka», — skazaŭ ser Kir.

Jaho Lejbarysckaja partyja ŭžo 12 hadoŭ nie moža viarnucca va ŭładu. A kansiervatary dziakujučy brekzitu i charyźmie Džonsana, naadvarot, majuć ciapier pieravažnuju bolšaść u parłamiencie — najvyšejšym orhanie ŭłady ŭ krainie.

Z deputataŭ ad kirujučaj partyi jaje lidar (premjer-ministr) nabiraje sabie kabiniet ministraŭ, a taksama palityčnych pryznačencaŭ u ministerstvy. Łava zapasnych u jaho doŭhaja — bolš za 200 deputataŭ padtrymali jaho ŭ červieni, dziakujučy čamu jon paźbieh votumu niedavieru.

Vidavočnych favarytaŭ na zamienu Džonsanu niama. Da hetaha času tory stavili na jaho, ale ŭsio mienš vierać, što jon pryviadzie ich da pieramohi na nastupnych vybarach. Adnak pry adsutnaści papularnych alternatyŭ niekatoryja nie śpiašajucca śpisvać jaho z rachunkaŭ.

Jany pamiatajuć, jak Džonsan umieje vychodzić suchim z vady.

Jaho zvalniali z haziety za vydumanyja cytaty, hnali z partyjnaj pasady za chłuśniu ab pazašlubnych suviaziach. Adnak papularnaść tolki rasła. Na rubiažy stahodździaŭ jon staŭ zorkaj kamiedyjnych telepieradač, vybraŭsia ŭ parłamient u 2001 hodzie, vyjhraŭ vybary mera Łondana ŭ 2008-m, uznačaliŭ paśpiachovuju kampaniju za vychad Vialikabrytanii ź ES u 2016-m, atrymaŭ ad partyi pasadu premjer-ministra letam 2019-ha hoda i praz paŭhoda vyjhraŭ dla jaje parłamienckija vybary z hihanckim adryvam ad apazicyi.

Džonsan nie saromiejecca i ličyć tuju pieramohu całkam svajoj zasłuhaj, a nie partyi. U sieradu ŭ parłamiencie jon tak i skazaŭ — «dadzieny mnie mandat».

Na pytańnie, pry jakich abstavinach jon usio ž zadumajecca ab adstaŭcy, Džonsan pad ululukańnie apazicyi i častki paplečnikaŭ adkazaŭ, što tolki ŭ tym vypadku, kali ŭrad budzie całkam paralizavany, ci… kali jamu buduć pieraškadžać padtrymlivać ukraincaŭ. Inšych pryčyn jon nie nazyvaŭ.

 

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
0
Radar/adkazać/
07.07.2022
Skromnyj -saramlivy
0
Jo.Łupień/adkazać/
07.07.2022
Radar, Skromnyj - ścipły Saramlivy - stydlivyj
0
Aresa/adkazać/
08.07.2022
Škada. Barys rašučy. Ukraincam ciapier budzie ciažej. Zaraz pryjdzie jaki-niebudź ścipły, abo saramlivy...
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera