Prakopjeŭ spadziajecca na vyzvaleńnie Biełarusi ŭkrainskaj armijaj
«Kali vy čakajecie ścisłaha, chutkaha płana pieramohi za 5 chvilin, ja vas rasčaruju. My na vajnie z 2020 hoda, z tych časoŭ, jak raźviejalisia apošnija nadziei na aksamitnuju revalucyju, jak nie spracavała teoryja niehvałtoŭnaha supracivu. My na vajnie nie z Łukašenkam — my na vajnie z ruskaj impieryjaj», — zajaviŭ Prakopjeŭ na kanfierencyi ŭ Vilni.
Prakopjeŭ praciahnuŭ:
«U biełarusaŭ byŭ šaniec u 2020 hodzie. Nazapašanaja praha žyćcia, praha pieramienaŭ, naša padušanaje jeŭrapiejstva vypluchnuła vonki, i praciŭnik byŭ razhubleny. Tydni dva ŭ nas było, kab źnieści kałhasnuju chuntu i sieści za stoł pieramovaŭ z razhublenaj Maskvoj. My ŭpuścili hety šaniec: tamu što lubavalisia narodnym padjomam, tak i nie dadumaŭšysia zrabić reziervovy kamandny punkt.
Čas syšoŭ, dobrych scenaryjaŭ nie zastałosia. Ciapier tolki vajna, tolki chardkor».
Prakopjeŭ spadziajecca na vyzvaleńnie Biełarusi ŭkrainskaj armijaj.
«Zahartavanaja ŭ bajach armija Ukrainy navat nie zaŭvažyć armii Łukašenki. Minsk budzie ŭziaty za try dni — jak Pucin maryŭ pra Kijeŭ», — tak maluje karcinu mahčymaj budučyni Vadzim Prakopjeŭ.
Ale, na jahonuju dumku, tak zdarycca tolki tady, kali Ukraina budzie bačyć u biełaruskaj apazicyi siłu i lutaje žadańnie pieramahčy. Pakul, na dumku Prakopjeva, Kijeŭ takoha nie bačyć.
Vadzim Prakopjeŭ nastojvaje, što treba stvaryć alternatyŭnyja orhany ŭłady, i heta musić być urad, a nie nabor inicyjatyŭ i supołak.
«U składzie hetaha ŭrada pavinna być hramadzianskaja i vajennaja častka, i ŭsie nieabchodnyja atrybuty padobnaj arhanizacyi, uklučajučy MZS, departamient finansaŭ, padlikovuju pałatu, słužbu ŭłasnaj biaśpieki».
U padnačaleńni ŭ hetaha ŭrada musiać być uzbrojenyja siły i «svoj maleńki «Masad», ličyć Prakopjeŭ.
«Kiraŭniku takoha ŭrada treba budzie prymać niepapularnyja rašeńni, mahčyma, padymać narod na paŭstańni». I zadaje pytańnie Cichanoŭskaj: vy hatovyja być takim kiraŭnikom?
Ën prapanuje Cichanoŭskaj užo zaŭtra «pryniać prysiahu, pakłaŭšy ruku na Kanstytucyju».
«Kali vaš adkaz «nie», my vas zrazumiejem i nie asudzim, ale paprosim vas pieradać častku paŭnamoctvaŭ premjer-ministru. Usio astatniaje — duraść i panty», — kaža Prakopjeŭ.