U Homieli vynieśli prysud Uładzimiru Pradkinu. Jon zdymaŭsia ŭ kino ŭ formie nacysckaha aficera
Homielski abłasny sud zaviaršyŭ razhlad kryminalnaj spravy ŭ dačynieńni da žychara Rečycy Uładzimira Pradkina, jakoha abvinavačvajuć pa art.130 Kryminalnaha kodeksa (raspalvańnie rasavaj, nacyjanalnaj, relihijnaj albo inšaj sacyjalnaj varožaści). U spravie jość jašče adzin artykuł — č.1 art. 342-1 (prapahanda samazabojstva), piša «Viasna».
Pa viersii śledstva, Uładzimir raźmiaściŭ na staroncy ŭ «VKontaktie» fotazdymak siabie ŭ formie niamieckaha aficera, jaki byŭ zrobleny padčas zdymkaŭ mastackaha filma ŭ Rasii, pad Maskvoj. Aproč hetaha, čałavieku pastavili ŭ vinu raźmiaščeńnie ŭ toj ža sacsietcy knihi ź miemuarami nacysckaha hienierała i kamientary ŭ «Adnakłaśnikach», dzie mužčyna nibyta chvalić Hitlera.
Sudździa Alaksandr Piskunoŭ pastanaviŭ pakarać Uładzimira pazbaŭleńniem voli ŭ kałonii ahulnaha režymu terminam na try hady.
