Znajści
Ałharytmičny łacinski varyjant
15.08.2022 / 12:073RusŁacBieł

Čamu niekatoryja ludzi paźbiahajuć blizkich adnosin i bajacca taktylnych kantaktaŭ?

Takaja psichałahičnaja prablema nazyvajecca kontrzaležnaściu. Jana źviazana z parušeńniem, jakoje zaklučajecca ŭ admovie ad prychilnaści i pryhniečańni pačućcia patreby ŭ inšym čałavieku. Psichaterapieŭtka Natalla Skibskaja tłumačyć, čamu ludzi bajacca blizkaści, jak zrazumieć, što ty kontrzaležny, i ci byvaje ŭvohule ŭ takich ludziej seks.

«Kali niechta daŭ u piasočnicy pa hałavie łapatkaj, to paśla ty budzieš stavicca da jaho naściarožana»

Kontrzaležnaść pačynaje farmavacca jašče ŭ dziacinstvie. Jak praviła, mienavita tady «maleńki čałaviek» atrymlivaje niehatyŭny dośvied adnosin ad svaich baćkoŭ. 

«My sacyjalnyja žyvioły i nam usim patrebny inšyja ludzi. Čałaviek vyrastaje nie za niekalki miesiacaŭ. Kab jon staŭ samastojnym, patrabujecca šmat času. Kab vychavać dzicia, treba ŭzajemadziejańnie mnohich asobaŭ: nie tolki taty i maci, ale i inšych rodzičaj, jakija mohuć dać dośvied hetamu maleńkamu čałavieku», — kaža Natalla. 

Pieršy dośvied adnosin — čaściej za ŭsio, heta maci, jakaja kłapocicca — vielmi mocna ŭpłyvaje na staŭleńnie da śvietu. Ale i stasunki ź siabrami ŭ dziacinstvie nakładajuć svoj adbitak.

«Kali niechta daŭ u piasočnicy pa hałavie łapatkaj, to paśla ty budzieš stavicca da jaho ci čymsci padobnym ludziam naściarožana ci prosta napružana da luboj inšaj novaj asoby, jakaja źjaŭlajecca ŭ tvaim asiarodździ», — tłumačyć psichaterapieŭtka.

U zaležnaści ad taho, jaki dośvied my majem, my budujem svaje adnosiny ź inšymi ludźmi ŭ darosłym žyćci. 

Kali my kažam pra hieteraseksualnyja adnosiny, to mocna ŭpłyvaje, jakija adnosiny ŭ dziaŭčynki byli z tatam ci ŭ chłopčyka z matulaj. 

«Kali, naprykład, tata da dziaŭčynki byŭ chałodny, nie cikaviŭsia jaje žyćciom, to jana ŭ darosłym žyćci moža ciahnucca da takich mužčyn, šukać takich ža padśviadoma. Prosta tamu, što ŭ jaje jość dośvied znosin z takim typam čałavieka. 

Kali dośvied z baćkami byŭ traŭmatyčny, to čałaviek u darosłym uzroście moža paźbiahać adnosin jak siabroŭskich, tak i ramantyčnych, seksualnych. U blizkich adnosinach nas mohuć vielmi baluča zakranuć, paranić, bo inšy čałaviek maje dostup da našaha cieła i našaj dušy. Adlehłaść maleńkaja, na joj vielmi niebiaśpiečna.

Dla kontrzaležnaha blizkaść značyć bol, sama blizkaść i jość traŭma. Samaje lepšaje ŭ takim vypadku trymacca na vialikaj dystancyi ci ŭvohule nie mieć nijakich blizkich znosin», — raskazvaje jana. 

Natalla paraŭnoŭvaje heta z chadžeńniem pa bałocie ci pa ŭstojlivaj hlebie.

«U druhim varyjancie čałaviek viedaje, što siudy možna nastupić i nie treba saskokvać u inšaje miesca ci šukać, na kaho možna abapiercisia», — kaža jana.

Takoje parušeńnie prychilnaści, pry jakim čałaviek baicca blizkaści, ale pry hetym maje patrebu ŭ prysutnaści inšaha, nazyvajecca kontrzaležnaść.

Jana budujecca ŭ adnosinach ź nienadziejnymi i niepradkazalnymi baćkami. Kali dzicia nie było ŭpeŭniena, naprykład, u tym, što jany nie buduć jaho kryŭdzić, bić, abražać. Ci baćki vielmi pa-roznymu pavodzili siabie u takich samych abstavinach. U takoha čałavieka kontrzaležnaść budzie ŭ jakaści pryjarytetnaha typu naładžvańnia znosin.

«Psichaterapieŭt byccam by dabudoŭvaje vam dośvied dobrych adnosin padčas siesij» 

Daloka nie ŭsie ludzi, jakija ŭstrymlivajucca ad znosin, majuć kontrzaležnaść. Čałaviek moža być prosta traŭmavany peŭnymi znosinamii. 

«Z baćkami, naprykład, usio było cudoŭna, a ŭ darosłym žyćci čałaviek mieŭ dośvied z abjuzieram. Kaniešnie, u asnovie zaŭsiody budzie strach być słabym, urazlivym, stać achviaraj. Mienavita jon utrymlivaje čałavieka ad taho, kab zachodzić u blizkija znosiny. 

Vielmi lohka možna zbłytać kontrzaležnaść i prosta traŭmu ad abjuziŭnych adnosin. Pa prykładzie stakholmskaha sindromu, kali toj, chto da ciabie drenna stavicca, źjaŭlajecca asobaj, ad jakoha ty tatalna zaležyš. Kali cieła sihnalizuje, što treba biehčy, spracoŭvaje dośvied, što ad jaho zaležyć tvajo žyćcio (jak z baćkami)», — tłumačyć Natalla.

Asnoŭnaja prykmieta najaŭnaści kontrzaležnaści — heta kali tabie niechta padabajecca, adčuvaješ ciahu da hetaj asoby, ale pužaješsia i pačynaješ nieŭśviadomlena niešta rabić, kab dystancyjavacca ad jaje. 

«Treba ščyra adkazać sabie na pytańnie, padabajecca vam niejki čałaviek ci nie, — kaža psichaterapieŭtka. — Tut jašče moža być takoje, što mnie chtości padabajecca, ale ja heta nie zaŭvažaju. Važny sihnał cieła. Pieršyja kroki ŭ adnosinach — heta kali naša bijałohija kaža, padychodzić čałaviek vam ci nie. Kali takija sihnały jość (naprykład, matyli lotajuć u žyvacie, uśmichaješsia, kali jaho bačyš), to kontrzaležnyja ludzi pačynajuć rabić usio, kab nie spadabacca hetamu čałavieku.

Darečy, takija ludzi zvyčajna vielmi samatojnyja i paśpiachovyja ŭ inšych halinach žyćcia. Naprykład, u karjery». 

Heta typ psichałahičnych prablem lakujecca ŭ terapii sa śpiecyjalistam. 

«Psichaterapieŭt byccam by dabudoŭvaje vam dośvied dobrych adnosin padčas siesij. Byvaje, što niekatorym ludziam šancuje, kali znachodzicca čałaviek, u jakoha jon zakachajecca i zmoža razam z partnioram hetyja barjery prajści, ale tak byvaje daloka niezaŭsiody. Skažam ščyra, što zvyčajna atrymlivajecca advarotny varyjant. U takim vypadku kontrzaležny čałaviek atrymlivaje dośvied, što zaležnaść i prychilnaść — heta drenna. Taki padychod dla budavańnia znosinaŭ zamacoŭvajecca.

Inšy momant — seksualnaje raźvićcio. Ciažka zrazumieć, što heta kankrietna: ja mazachist i zadavalnieńnie mahu atrymać tolki ŭ takich adnosinach ci ja prosta kontrzaležny čałaviek, jaki atrymaŭ peŭny niehatyŭny dośvied. I heta treba vyśviatlać u kabiniecie psichołaha», — tłumačyć Skibskaja.

«Kontrzaležnamu važna dazvolić tryvožycca pobač z saboj, ale nie pavialičvać hetu tryvohu» 

Ludziam, jakija znachodzicca pobač z kontrzaležnym, treba stać dla jaho nadziejnaj asobaj. Dać prykład adnosin, u jakich moža być dobra i biaśpiečna. 

«Kali pačynajucca niejkija svarki pamiž vami, tut varta być ustojlivym i nie kryŭdzicca na kontrzaležnaha. Prajści razam składanaści. Ale heta prablematyčna, bo kontrzaležny navat i nie skaža, na što jon pakrydziŭsia, budzie chadzić i hučna maŭčać. 

U hetaj situacyi treba być uvažlivym. Chaj niešta siabar ci partnior niedahavorvaje, ale nie kryŭdziciesia ŭ adkaz. Kryŭda budzie ŭsprymacca kontrzaležnym, jak dokaz, što vy niešta drennaje zrobicie ŭ adnosinach da jaho. I samaje hałoŭnaje — budźcie pradkazalnymi. Kali paabiacali pryjechać, to pryjedźcie. Skazali, što pabačyciesia, to trymajcie svajo słova», — raić Natalla. 

Čałaviek, ź jakim u kontzaležnaj asoby ŭstaloŭvajucca adnosiny, nie moža dapamahčy źnizić tryvohu, a naadvarot: u jaho prystunaści jana pavialičvajecca. Tamu tut važna pakazać partnioru ci siabru, što jon moža pobač z vami tryvožycca, ale vy nie budziecie pavialičvać hetuju tryvohu. 

Taksama ŭ niekatorych kontrazaležnych asob jość strach taktylnych kantaktaŭ. Jon byvaje dla ich nievynosnym. 

«U ich samy lepšy kantakt z samim saboj. 

Ujavim žyviołu, u jakoj jość ščupalcy i jakoj treba ich vyprastać, kab kantaktavać. Dyk voś kontrzaležny nie moža ich vyprastać. Jon budzie rabić usio, ale prasić nie datykacca da jaho ni słovam, ni pozirkam», — kaža psichaterapieŭtka. 

Kontrzaležny čałaviek całkam abapirajecca tolki na siabie. Jon navučyŭsia tak žyć. 

«Kontrzaležnaha my vučym, što možna abapiracca kali-niekali na inšych ludziej. 

Ujavicie, što dva čałavieki iduć pa chistkim mastku praz rečku. Kontrzaležny skaža, što jon lepš pojdzie sam, čym pavieryć inšamu čałavieku, jaki zmoža jaho trymać. Budzie dumać, što kali jon upadzie, to druhi čałaviek, jakomu pavieryŭ, kinie jaho i nie dapamoža», — raskazvaje Natalla.

Što varta rabić baćkam, kab nie sfarmavać u dzicia kontrzaležnaść?

«Nie chłusić, a kazać praŭdu, — raić psichaterapieŭtka. — Kali vy vinavaty, nie kazać na dzicia, što jon durny i nie tak niešta zrazumieŭ. Paabiacali ŭviečary pryvieźci maroziva, to tak i treba zrabić. A kali vy nie paśpieli ŭ kramu, paprasić prabačeńnia, rastłumačyć, čamu tak adbyłosia. 

Da dziaciej ŭvohule treba stavicca jak da samych darahich haściej, jakija pryjšli atrymać dośvied i pajści dalej žyć svaim žyćciom».

Zapuščanaja kontrzaležnaść moža pryvieści da asacyjalizacyi. 

«Treba razumieć, što kontrzaležnaść — heta taksama sposab adaptacyj. Mienavita takim čynam čałaviek siabie ratuje ad bolu, kryŭdy, razbureńnia. I biez adnosinaŭ taksama možna žyć. Chtości budzie praktykavać razavy seks, heta taksama vyjście. 

U vyniku z-za taho, što ŭ čałavieka niama hetaha tryvałaha dośviedu sacyjalnych adnosin mienavita ŭ blizkim asiarodździ, jon dzičeje.

Samaje niebiaśpiečnaje tut, što ŭ takoha čałavieka niama taho, ab kim kłapacicca, i taho, chto pra jaho pakłapocicca. Kontrzaležny navat užo nie ŭmieje hetaha rabić, razvučyŭsia ci nie navučyŭsia.

Kali čałaviek budzie ŭ drennym psichałahičnym stanie, hetaha nichto nie zaŭvažyć, nie budzie kamu. Akramia taho, z-za strachu zaležać ad inšych kontrzaležny čałoviek budzie ŭsimi mačymymi sposabami paźbiahać źviartacca pa dapamohu, navat nie tolki svaječasova, ale kali ŭžo daŭno varta, i z-za hetaha traplać u vielmi drennyja, navat niebiaśpiečnyja situacyi. Tamu maja parada takomu čałavieku — pajści da śpiecyjalista», — padsumoŭvaje Natalla.

Čytajcie taksama: 

Narkołah — pra biaśpiečnyja dozy vypiŭki, samy škodny vid ałkaholu i toje, kali varta źviarnucca pa dapamohu

Nijakaj biassońnicy: prapanujem mietad, ź jakim vy možacie zasnuć za chvilinu

5 prykmiet taho, što ŭ vas moža być abiazvodžvańnie

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
2
Lucian/adkazać/
15.08.2022
psichaterapeŭt - heta nie prafiesija, a psichatierpija - nie navuka.

Kontrzaležny čałaviek całkam abapirajecca tolki na siabie. Jon navučyŭsia tak žyć.

i heta samaje lepšaje, što moža byť z čałaviekam. Zausiody ty možaš oaźličvać TOLKI na siabie.

0
hierdzień /adkazać/
16.08.2022
zhodny. kali ciabie pastajanna padvodzić, to raźličvać treba tolki na siabie
0
Žuk/adkazać/
04.11.2022
Točno pro mienia
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera