U Jehipcie bolš za 40 čałaviek zahinuli padčas pažaru ŭ kopckaj carkvie
U kopckaj carkvie horada Hiza ŭ Jehipcie ŭźnik pažar, u vyniku jakoha zahinuŭ prynamsi 41 čałaviek, dziasiatki atrymali ranieńni. Paviedamlajecca, što mnohija ludzi paciarpieli ŭ ciskaninie, jakaja ŭźnikła paśla zaharańnia. Siarod zahinułych jość dzieci, piša «Bi-bi-si».
Fota: Getty Image
Krynicy ahienctva «Rojters» paviedamili, što na słužbu ŭ carkvie «Abu-Sifin» sabrałasia kala 5 tysiač čałaviek. Pavodle papiarednich źviestak, pažar byŭ źviazany z zaharańniem elektrapravodki, a jaho ačah znachodziŭsia kala dźviarej chrama. U vyniku vychad z budynka akazaŭsia zabłakavany, uźnikła ciskanina.
Ciapier pažar patušany, pra jaho pryčyny pakul dakładna nie viadoma, adnak adzin sa śviataroŭ susiedniaj carkvy paviedamiŭ ahienctvu «Frans-Pres», što budynak zahareŭsia z-za karotkaha zamykańnia. «Tam nie było elektryčnaści, i jany vykarystoŭvali hienieratar, — skazaŭ jon. — Kali elektryčnaść znoŭ źjaviłasia, adbyłasia pierahruzka».
Śviedki apisvali momant pačatku pažaru tak: «Na trecim i čaćviortym paviersie źbiralisia vierniki, i my ŭbačyli, jak z druhoha paviercha pavaliŭ dym. Ludzi pabiehli ŭniz pa prystupkach i stali padać adzin na adnaho, — raskazaŭ ahienctvu Rejter adzin ź viernikaŭ Jasir Munir. — Potym my pačuli vybuch, ubačyli iskry i ahoń u aknie». Munir patłumačyŭ, što ŭ hety čas jon razam z dačkoj znachodziŭsia na pieršym paviersie, tamu paśpieŭ uciačy.
Fota: Getty Image
Prezident Jehipta Abduł Fatach as-Sisi vykazaŭ «ščyryja spačuvańni siemjam niavinnych achviar, jakija ŭźjadnalisia z Hospadam u adnym z chramaŭ». Na miesca zdareńnia adpraviłasia hrupa supracoŭnikaŭ prakuratury, jakim treba budzie rasśledavać pryčyny trahiedyi.
Hiza znachodzicca na bierazie Niła i ŭvachodzić u kanhłamieracyju Kaira. U Jehipcie, krainie z nasielnictvam 103 młn čałaviek, — kala 10 młn chryścijan-koptaŭ. Jehipieckija chryścijanie časta skardziacca na dyskryminacyju, jany adyhryvajuć u žyćci krainy kudy mienšuju rolu, čym mahli b, zychodziačy sa svajoj kolkaści.
