BT śćviardžaje, što ŭ damach ispancaŭ masava adklučajuć elektryčnaść. Ale heta poŭnaja chłuśnia
Łukašenkaŭskaja prapahanda praciahvaje pužać biełarusaŭ Jeŭropaj, paralelna raskazvajučy, jak tam ciažka žyviecca. Prapahandysty schapilisia za temu enierhietyčnaha kryzisu, škadujučy biednych jeŭrapiejcaŭ. Ale dvojčy pamylilisia.
Fota: Pixabay.
U pryvatnaści, u efiry BT śćviardžajuć, što ŭ pryvatnych damach ispancaŭ paśla 22:00 nibyta vyklučajuć elektryčnaść.
«U Ispanii pačalisia abaviazkovyja adklučeńni elektraenierhii pa ŭsioj krainie. Akramia vysokich cen na enierhiju, adbivajecca i novaja chvala śpioki, a taksama rekordna nizki patok turystaŭ, heta značyć adsutnaść zvykłaj krynicy dachodu dla mnohich rabotnikaŭ śfiery haścinnaści. Ciapier paśla 22 hadzin vyklučajecca nie tolki padśviatleńnie słavutaściaŭ u Barsiełonie i Madrydzie, ale i elektryčnaść u pryvatnych damach hramadzian», — śćviardžaje BT.
U karotkim paviedamleńni prapahanda schłusiła niekalki razoŭ. Pieršy raz — pra «rekordna nizki patok turystaŭ» u Ispanii.
Hety fejk lubiać razhaniać rasijskija prapahandandysty, kab pierakanać rasijan, što Jeŭropa zahniecca biez rasijskich turystaŭ. Ale patok turystaŭ u Ispaniju imkliva raście z kastryčnika 2021 hoda i amal dasiahnuŭ dakavidnych pakazčykaŭ.
Anałahičnaja chłuśnia i pra adklučeńni elektryčnaści ŭ pryvatnych damach. Ispanski ŭrad papraŭdzie padrychtavaŭ novyja miery pa enierhaźbieražeńni. U pryvatnaści, ciapier u haradach paśla 22:00 buduć adklučać padśvietku vitryn i kavavych aŭtamataŭ. Taksama ŭ Ispanii dziejničajuć abmiežavańni na vykarystańnie kandycyjanieraŭ, vyznačany tempieraturny limit dla letniaha i zimovaha siezonaŭ. Ale ŭ pryvatnych damach nichto elektryčnaść nie adklučaje.
Voś što kaža «Našaj Nivie» biełarus z Katałonii Pavieł Kirylonak pra prapahandysckaje paviedamleńnie.
«Anijakich abmiežavańniaŭ u pryvatnych damach, kvaterach niama, absalutna.
Adzinaje, što zrabili — heta abaviazali kandycyjaniery ŭ publičnych prastorach na 27 hradusaŭ stavić. U kramach, restaranach, i hetak dalej.
Elektryčnaść krychu padaražeła, heta tak. Ale tut heta nie najvialikšaja častka raschodaŭ, skažam tak. Na piva narod bolš tracić», — kaža biełarus z Katałonii.
