Łukašenka zahavaryŭ pra amnistyju, «pierahiby» i «zakłapočanaść mnohich hramadzian»
Na naradzie ŭ Alaksandra Łukašenki 6 vieraśnia abmiarkoŭvałasia zapłanavanaja na 17 vieraśnia amnistyja.
Zatrymańni ŭ centry Minska 27 lutaha 2022 hoda
«Napiaredadni Dnia narodnaha adzinstva (jak vy viedajecie, adznačajecca 17 vieraśnia) prapanujecca abmierkavać metazhodnaść amnistyi», — skazaŭ u prysutnaści telekamier Alaksandr Łukašenka. Takaja prapanova, skazaŭ jon, ahučanaja «ŭ suviazi z zakłapočanaściu mnohich hramadzian krainy».
Jon adznačyŭ, što «siarod asudžanych jość samyja roznyja ludzi, u ich liku vypadkova spatyknulisia, jakija ŭčynili złačynstvy pa nieaściarožnaści, a taksama niaznačnyja złačynstvy, uklučajučy dziejańni pratestavaj nakiravanaści».
«Za apošnija dva hady ŭsie parazumnieli. Asabliva ŭ miescach nie hetak addalenych. Ale heta ŭžo MUS zaraz dałožyć, jany i niasuć piersanalnuju adkaznaść za tych, chto budzie amnistavany.
Dy i pracavać ź imi na voli. Kali hetyja ludzi raskajalisia, ŭstali na šlach vypraŭleńnia, całkam zahładzili svaju vinu, da ich možna prajavić łasku. Prapanuju abmierkavać koła asob, na jakich varta raspaŭsiudzić amnistyju», — dadaŭ Łukašenka.
Pry hetym Alaksandr Łukašenka ličyć patrebnym razhledzieć kančatkovy varyjant padrychtavanaha dakumienta na śpiecyjalnaj kamisii.
«Ludzi jašče nie adyšli ad taho 2020 hoda. Časam i pierahiby dapuskajucca z boku našych prychilnikaŭ: «Usich mačyć, sadžać i hetak dalej». Viedajecie, adzinstva ŭ hramadstvie heta nikoli nie dadavała. Ale tym nie mienš prosta adyści ad hetaha pytańnia i nie čuć hetych ludziej — tak nie budzie», — skazaŭ Łukašenka.
«Ale pry hetym ja chaču padkreślić: padpisvać mnie. Tamu majcie na ŭvazie, usio, što ja skazaŭ, pa duchu pavinna adpaviadać. My nie možam naleva i naprava adpuskać usich. Chto pavinien siadzieć u turmie, pavinien siadzieć. Ale jašče raz padkreślivaju, jość ludzi, jakich my svabodna možam vyzvalić daterminova. Pasłableńni dapuščalnyja tolki ŭ dačynieńni da tych, chto realna hetaha zasłuhoŭvaje. Bandyty i ekstremisty nie z hetaj sieryi! Asabliva tyja, jakija sprabavali pad adchon puścić našy ciahniki, rychtavali terarystyčnyja akty», — skazaŭ Łukašenka.
Siarod palitźniavolenych — biblijatekarka Julija Łaptanovič i jaje muž, budaŭnik, Ihar ź Biełavusaŭščyny pad Pružanami. Troje ich dziaciej zastalisia na rukach baby ź dziedam
