«Trymaŭsia da apošniaha». Žychary Čerykava pra zatrymanaha za «palityku» ziemlaka
44-hadovy čerykaŭski pradprymalnik Dźmitryj Ivanoŭ pajšoŭ u palityku ŭ 2020 hodzie, a padčas pratestaŭ staŭ adnym ź ich aktyŭnych udzielnikaŭ. Niekalki razoŭ jaho zatrymlivali, štrafavali, kidali «na sutki». Dniami jon byŭ schopleny ŭzbrojenymi siłavikami.
Pra źniavoleńnie žychara Čerykava stała viadoma ź videa, apublikavanaha 23 vieraśnia prapahandysckim telehram-kanałam. U roliku mužčyna kaža, što zatrymany za kamientary ŭ sacyjalnych sietkach i zdymańnie vajennaj techniki.
Paźniej źniavoleńnie Ivanova paćvierdzili jaho adnapartyjcy ź Biełaruskaj sacyjał-demakratyčnaj partyi «Hramada», u jakuju jon zapisaŭsia ŭ 2021 hodzie. Vyśvietlić, što inkryminujecca jamu pakul nie ŭdałosia.
Čamu staŭ aktyvistam pratestu
U Čerykavie Dźmitryj taksuje. Zatrymali jaho na adnoj ź miascovych stajanak. Uzbrojenyja śpiecnazaŭcy vyciahnuli kiroŭcu z mašyny i pakłali tvaram da ziamli. Supracivu, jak vynikaje ź videa, jon nie akazvaŭ. Pra svajo zatrymańnie apaviadaje spakojna.
U rajcentry Dźmitryja Ivanova znajuć mnohija. U 2020 hodzie miascovyja žychary, jak i va ŭsioj Biełarusi, vychodzili na pratesty. Pratestnaja aktyŭnaść u 8 tysiačnym horadzie tryvała da 19 žniŭnia. Miascovyja kažuć, što na pieršyja łancuhi salidarnaści vychodziła da 200 čałaviek.
Dźmitryj byŭ siarod aktyvistaŭ pratestu. Jak jon sam kazaŭ, da 2020 hodu ličyŭ siabie apalityčnym čałaviekam. Adnak, «paharšeńnie žyćciovaha ŭzroŭniu i abyjakavaść ułady dy vyrašeńnia prablemaŭ prostaha čałavieka prymusili zacikavicca jaho prahramami kankurentaŭ dziejnaha kiraŭnika dziaržavy», bo toj ničoha kankretnaha nie prapanoŭvaŭ.
Fota: archiŭ Dźmitryja Ivanova
Pavodle pradprymalnika, žyćcio ŭskładniŭ tady i karanavirus, jaki pazbaviŭ žycharoŭ hłybinki mahčymaści vyjazdžać na zarobki ŭ Rasiju, što adbiłasia na ichnym dastatku.
Dźmitryja za pratesty niekalki razoŭ zatrymlivali i štrafavali. 30 dzion adsiedzieŭ «na sutkach». Pra toje jon kaža ŭ apublikavanym videa. Dadaje, što byŭ zarehistravany ŭ płanie «Pieramoha» kiroŭcam.
Aryštavali, bo «nie daravali pratesnaj aktyŭnaści»
Pra toje, što dniami jaho ŭ čarhovy raz zabrała milicyja čerykaŭcy viedajuć. Mnohija znajomcy ŭstrymlivajucca ad kamientaroŭ nakont udziełu Dźmitryja «u palitycy».
«Nastyrny byŭ vielmi. Nie chacieŭ zdavacca, možna skazać tak», — adznačyŭ adzin ź ich.
Pa jaho słovach, u takich haradach, jak Čerykaŭ, žychary adzin adnaho viedajuć, adpaviedna lubaja aktyŭnaść navidavoku, a za Dźmitryjem była asablivaja ŭvaha.
Jašče adzin surazmoŭca, jaki nazvaŭ siabie klijentam zatrymanaha, upeŭnieny, što «Dźmitryja zabrali, bo nie daravali jamu dziorzkaści ŭ 2020 hodzie».
«Jaho pasadziać, jak i ŭžo mnohich. Pryciahnuć kryminałku, moža i adpuściać, ale «sutkami» sprava nie skončycca. Na jaho prykładzie pakažuć žycharam Čerykava, što im budzie za niepadparadkavańnie», — kaža jon.
Pra prafiesijnyja jakaści Dźmitryja, jak taksista, jaho ziemlaki adhukajucca dobra. Kažuć, što «sarviecca ŭ lubuju chvilinu i kudy treba padviazie». Pa ich słovach, vialikich hrošaj na taksavańni nie zarablaŭ. Nie adzin hod budavaŭ dom, ale skončyć spravy jamu nie ŭdavałasia. Niedabudavanuju chatu Dźmitryja pakazali siłaviki ŭ videa jak prykład niadbajnaści haspadara.
Dźmitryj pra žycharoŭ hłybinki kazaŭ, što mnohija ź ich źmirylisia sa svajoj niezajzdrosnaj dolaju. Pa jaho słovach, bolšaść nie viedaje, jak žyć inačaj, i šukaje paratunak u ałkaholi. Niamała žycharoŭ rajcentra, zaŭvažaŭ jon, idučy vulicaj, nie padymajuć vačej i heta šmat ab čym śviedčyć.
«Partreta Łukašenki ŭ kłasie nie było». Biełarusy, jakija skončyli pryvatnuju škołu, raskazali, jak jany tam vučylisia
«Treba ratavać Łukašenku ad Rasii». Daradca Cichanoŭskaj raspavioŭ, što Makiej kazaŭ pradstaŭnikam Zachadu ŭ kułuarach AAN
Łukašenka pazbaviŭ zvańniaŭ 80 aficeraŭ, u tym liku z KDB i ŭłasnaj Słužby biaśpieki. Ašałamlalnaje pryznańnie, nakolki šmat praciŭnikaŭ režymu ŭnutry siłavych struktur
