Vałhahrad zatapiła dziarmom paśla praryvu kanalizacyi — zatapiła ŭ litaralnym sensie FOTY
Vałhahrad sutyknuŭsia z adnoj z samych maštabnych za apošniaje dziesiacihodździe technahiennych avaryj. U horadzie prarvała najbujniejšy kanalizacyjny kalektar, i 200 tysiač čałaviek na čatyry dni zastalisia biez vady i prybiralni, a ścioki paciakli ŭ Vołhu.
Nočču 28 kastryčnika ŭ Vałhahradzie abrynuŭsia zvod bietonnaha kanała dla kanalizacyjnaha kalektara. Z-za praryvu prakładzienaj 50 hadoŭ tamu truby dyjamietram 1200 milimietraŭ byli zatoplenyja vielizarny park la muzieja «Rasija — maja historyja», dziciačaja čyhunka, Nulavaja mahistral. Potym masy palilisia ŭ Vołhu.
Pavodle adnoj ź viersij, pra jakuju paviedamlaje miascovaje vydańnie V1, padčas budaŭnictva skviera imia Alaksandry Pachmutavaj u byłoj pojmie raki byli paškodžanyja płasty ziamli i karani dreŭ, jakija ŭtrymlivali hlebu. Uviečary 27 kastryčnika doždž razmyŭ pahorak, utvaryłasia jama dyjamietram kala 20 mietraŭ, a potym abrynuŭsia zvod kalektara.
U vyniku biez vady zastalisia niekalki rajonaŭ Vałhahrada, u jakich žyvie kala 200 tysiač čałaviek. Ramontnyja pracy praciahvajucca čaćviorty dzień.
Tak skvier Pachmutavaj vyhladaŭ, kali ściokavyja vody ciakli pad ziamloj
«Vałhahrad sutyknuŭsia z adnoj z samych maštabnych za apošniaje dziesiacihodździe technahiennych avaryj. Surjoznyja składanaści stvaraje adsutnaść prajektna-kaštarysnaj dakumientacyi na kalektar, jaki byŭ pabudavany paŭstahodździa tamu, dakumienty nie adpaviadajuć rečaisnaści. Vyśvietliłasia, što zamiest bietonnaha kalektara ścioki išli pa mietaličnaj trubie, jakaja nie pryznačanaja dla takich metaŭ. Za doŭhija hady jana pieratvaryłasia ŭ truchu i razburyłasia pry zruchu razmokłaha ad daždžoŭ hruntu», — zajaviŭ hubiernatar Vałhahradskaj vobłaści Andrej Bačaraŭ.
31 kastryčnika prakuratura raspačała dźvie kryminalnyja spravy: ab nienaležnym vykanańni rabot i niebiaśpiečnych pasłuhach (č. 1 art. 238 KK RF) i ab zabrudžvańni Vołhi ściokavymi vodami (č. 1 art. 250 KK RF).
Pieršyja hadziny paśla abvału
Abvał ros nie po dniach, a pa hadzinach
Dziciačaja čyhunka patanuła ŭ race fiekalij
Dla samych važnych apieratyŭnych narad la miesca avaryi nadźmuli sinija pałatki
Čarha pa vadu
