U Rasii źjaviłasia kopija viadomaha minskaha bara «Siniaja kaza». Spłahijacili litaralna ŭsio
Abakan — daloki horad u Respublicy Chakasija, jakaja znachodzicca niedaloka ad Manholii. Mienavita ŭ hetym rasijskim horadzie zapracavaŭ bar «Siniaja kaza», jaki kaspłeić minskuju ŭstanovu až da łahatypa. Prynamsi tak ličać minčanie, piša Citydog.by.
«Siniaja kaza» — viadomy i atmaśfierny minski bar na Revalucyjnaj z aryhinalnym interjeram i łahatypam.
— Nazva išła doŭha, a pryjšła ŭ śnie, — dzielacca historyjaj stvareńnia supracoŭniki bara. — Stvaralnikam pryśniłasia kaza, jakaja hraje na skrypcy. Jak akazałasia paźniej, heta karcina Šahała. I pazł skłaŭsia: Šahał — biełarus, jaho tvorčaść viedajuć i lubiać va ŭsim śviecie. Jon avanhardyst, roskvit hetaj płyni byŭ 100 hadoŭ tamu — prykładna tady ž, kali byŭ uźviedzieny naš budynak.
Uspomnili, što kaza ŭ śnie była jašče i siniaha koleru, i padumali: «A čamu b nie nazvać naš bar «Siniaja kaza»?»
Patelefanavali znajomamu architektaru i dyzajnieru Viktaru Kalečycu, jaki i zajmaŭsia afarmleńniem i stylem interjera. Jon ža rabiŭ niezvyčajnuju leśvicu, jakaja viadzie da hałoŭnaha ŭvachoda. Vyrašyli zamović u jaho łahatyp i šyldu.
Na łahatypie kirylica splatajecca ŭ vobraz kazy.
Adkul źjaviŭsia dakładna taki ž bar, ale za tysiačy kiłamietraŭ?
Instagram u abakanskaj ustanovy źjaviŭsia niadaŭna: 1 vieraśnia paviedamili ab chutkim adkryćci i dadali:
— Miascovyja pradukty i mastak Mark Šahał natchnili nas na stvareńnie łakalnaha restarana z aŭtarskim mieniu ŭ soniečnaj Respublicy Chakasija.
U minskaj «Kazie» pryznajucca, što dla ich navina stała niečakanaściu: ubačyli teh u sacsietkach, pahladzieli i byli ŭ šoku:
— Nu dobra, idei niekatoryja ŭziatyja, ale całkam u interjery navošta prajhrany naš aŭtarski łahatyp, jaki my raspracoŭvali z dyzajnieram!
Kamientatary ŭ sacsietkach žartujuć, što ŭ minskim bary niadaŭna źnikli fihurki koz — niaŭžo navat ich skrali?
Žurnalisty chacieli pahutaryć z rasijskim «kłonam», ale ŭładalniki, pračytaŭšy paviedamleńnie ŭ aficyjnym instahramie ŭstanovy, adkazvać nie paličyli patrebnym. Niekatoryja aburanyja minčuki adznačajuć, što na ich pytańni abakanskija restaratary taksama nie adkazvajuć, prosta błakujuć akaŭnty.
Minskija ŭładalniki i zasnavalniki «Kazy» pakul nie płanujuć źviartacca ŭ sud, ale vielmi zasmučanyja takim nieprykrytym płahijatam.