Eks-sukamiernik Bredzieleva: U CIP jon pryjechaŭ z całkam fijaletavymi nahami
U Minskim haradskim sudzie 24 kastryčnika da čatyroch hadoŭ kałonii va ŭmovach ahulnaha režymu asudzili 35-hadovaha palitźniavolenaha kiraŭnika ŭpraŭleńnia suviaziaŭ z hramadskaściu kampanii A1 Mikałaja Bredzieleva. Paśla zatrymańnia Mikałaja ŭ śniežni 2021 hoda stała viadoma, što siłaviki jaho źbivali, ale nie byli viadomyja padrabiaznaści. Sukamiernik Mikałaja z Centra izalacyi pravaparušalnikaŭ na Akreścina (jaho imia nie raskryvajecca ŭ metach biaśpieki) raspavioŭ «Viaśnie», u jakim stanie Bredzieleŭ trapiŭ u kamieru.
Mikałaj Bredzieleŭ ź siabram Alaksiejem byŭ zatrymany 10 śniežnia 2021 hoda supracoŭnikami HUBAZiKa. Jaho były sukamiernik raspaviadaje, što Mikałaja ŭ CIP pryvieźli ŭsiaho źbitaha:
«U CIP jon pryjechaŭ z całkam fijaletavymi nahami, źbivali mocna. Miarkujučy pa jaho stanie — prymali žorstka. My — 15-20 čałaviek — spali na padłozie, tamu raspranalisia da bializny, bo aciapleńnie było na maksimumie. Tamu ŭsie bačyli siniaki Mikałaja. Heta byli prama čorna-fijaletavyja plamy pa ŭsich ściohnach, na ciele taksama byli: śpina, baki. Nikoli nie zabudu».
Eks-sukamiernik Mikałaja ŭspaminaje, što toj nie raspaviadaŭ padrabiaznaściej pra svajo zatrymańnie. Pavodle jaho, jon navat vykazać zdahadku nie moža, čym i jak treba było źbivać čałavieka, kab utvarylisia takija hiematomy:
«Kali dubinkaj, to treba vielmi šmat razoŭ udaryć, kab atrymać takoje sucelnaje pakryćcio».
Mikałaja zatrymlivali ź jaho siabram Alaksiejem. Jaho sukamiernik raspaviadaŭ «Našaj Nivie», što toj taksama byŭ mocna źbity:
«Mikałaja Bredzieleva i jaho siabra-advakata Alaksieja, jak ja viedaju, zatrymlivali razam i vielmi žorstka. Ich źbili, u kvatery złamali techniku. Advakat byŭ siniušny: nohi ŭ siniakach, pajaśnica, siniak pad vokam».
Jak adrazu paviedamlałasia ŭ praŭładnych telehram-kanałach, dzie było apublikavana «pakajalnaje» videa z Bredzielevym, Mikałaj nibyta ź lipienia 2020-ha pieradavaŭ trecim asobam infarmacyju, źviazanuju ź jaho prafiesijnaj dziejnaściu (danyja klijentaŭ A1), ale potym u kampanii zajavili, što Bredzieleŭ nie mieŭ dostupu da danych klijentaŭ.
«Jaho vazili na dopyt ź CIPa i, jak ciapier pamiataju, jon pryjechaŭ nazad i skazaŭ, što śledčyja pryznajuć, što na jaho niama ničoha, i, maŭlaŭ, «jaho padstavili». Jon zaŭsiody śćviardžaŭ, što ŭ jaho niama navat dostupu da hetaj infarmacyi, u źlivie jakoj jaho padazravali».
Były sukamiernik Mikałaja ŭzhadvaje jaho mocnyja chvalavańni:
«Jon vielmi pieražyvaŭ, byŭ nastrojeny piesimistyčna i depresiŭna. Paźniej akryjaŭ, pačaŭ zajmacca sportam, šmat čytać… Jon da apošniaha spadziavaŭsia, što jaho apraŭdajuć».
Spačatku Mikałaja asudzili na 15 sutak, a potym pradjavili abvinavačvańnie i pieraviali ŭ SIZA-1. Paśla dziesiaci miesiacaŭ pad vartaj nad Bredzielevym raspačaŭsia sud, ale sudzili jaho nie pa artykułach za «źliŭ dadzienych». U Minskim haradskim sudzie 24 kastryčnika Mikałaja asudzili da čatyroch hadoŭ kałonii va ŭmovach ahulnaha režymu. Jaho abvinavacili ŭ «finansavańni ekstremisckaha farmiravańnia» (art. 361-2 Kryminalnaha kodeksa) i apraŭdali pa č. 2 art. 424 KK (złoŭžyvańnie ŭładaj ci słužbovymi paŭnamoctvami) pa pryčynie niedakazanaści viny. Sud nad Mikałajem prachodziŭ u zakrytym režymie, tamu jaho padrabiaznaści nieviadomyja.
«Vielmi pryjemny, intelihientny i ščyry čałaviek. Jon viasioły i aktyŭny tavaryš, majstar hulni ŭ «Krakadziła» i «Mafiju» — my na praciahu dnia bavili čas za roznymi hulniami», — uspaminaje čas u CIP były sukamiernik Mikałaja.
Padtrymajcie Mikałaja: SIZA-1, 220030, Minsk, Vaładarskaha, 2, Mikałaj Alehavič Bredzieleŭ.
Čytajcie taksama:
Pres-sakratara A1 asudzili za «finansavańnie ekstremisckaha farmavańnia», jakoha nie isnavała
