Administratara niezaležnych čataŭ asudzili na 15 hadoŭ
Stanisłaŭ Kuźmicki — minski pradprymalnik, jaki byŭ asudžany 3 listapada na 15 hadoŭ pazbaŭleńnia voli va ŭmovach uzmocnienaha režymu. Jaho abvinavacili ŭ administravańni bolš za 30 telehram-čataŭ, u pryvatnaści čata «97», paviedamlaje Dissidentby.
Minski haradski sud pačaŭ razhlad kryminalnaj spravy 36-hadovaha pradprymalnika 15 vieraśnia.
Sudovy praces vioŭ sudździa Jaŭhien Chatkievič.
Stanisłava Kuźmickaha abvinavačvali pa šaści artykułach Kryminalnaha kodeksa, pisała «Viasna»:
- č. 1 art. 293 — masavyja biesparadki;
- č. 1 art. 290-4 — stvareńnie arhanizacyi dla ažyćciaŭleńnia terarystyčnaj dziejnaści albo ŭdzieł u joj;
- č. 1 art. 361-1 — stvareńnie ekstremisckaha farmiravańnia abo ŭdzieł u im;
- č. 1 art. 342 — arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich;
- č. 3 art. 361 — zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś;
- č. 3 art. 130 — raspalvańnie rasavaj, nacyjanalnaj, relihijnaj albo inšaj sacyjalnaj varožaści abo varažniečy.
Kuźmicki byŭ zatrymany naprykancy śniežnia 2021 hoda i da suda ŭtrymlivaŭsia ŭ SIZA №1 Minska.
KDB Biełarusi ŭnios jaho ŭ śpis asobaŭ, datyčnych da terarystyčnaj dziejnaści.
Pavodle materyjałaŭ śledstva, Kuźmicki, «majučy pierakručanyja kaštoŭnaści i łžyvaje razumieńnie słova «patryjatyzm», metanakiravana ŭstupiŭ u terarystyčnuju arhanizacyju i ŭznačaliŭ asobnyja resursy sietki «…97». Jon administravaŭ bolš za 30 čataŭ <…> Mužčyna farmavaŭ skład ekstremisckich supolnaściaŭ, raźmiarkoŭvaŭ roli i arhanizoŭvaŭ udzieł ich siabraŭ u akcyjach pratestu. Akramia hetaha, jon prymaŭ miery pa zhurtavańni i pavieličeńni kolkaści supolnaściaŭ: maralna padtrymlivaŭ ich u hutarkach pryvatnaha charaktaru, arhanizoŭvaŭ praviadzieńnie sumiesnaha volnaha času, raspaŭsiudžvańnie ahitacyjnaj pradukcyi, naniasieńnie malunkaŭ i nadpisaŭ ekstremisckaha charaktaru na fasady budynkaŭ».
Cledstva śćviardžaje, što jon «asabista šeść razoŭ udzielničaŭ u padobnych supraćpraŭnych dziejańniach».
