Jak dziaržaŭnyja ŚMI adreahavali na navinu pra adychod rasijskich vojskaŭ z Chiersona
Prajšli amal sutki paśla naviny pra toje, što rasijskija vojski pakidajuć Chierson. Jak na hetu navinu adreahavali asnoŭnyja biełaruskija dziaržaŭnyja ŚMI, praanalizavaŭ «Biełaruski Hajun».
Biełaruskaje telehrafnaje ahienctva BiełTA — 0 paviedamleńniaŭ ab abvieščanym adstupleńni RF z Chiersona.
Adzinaja navina na sajcie, jakaja maje dačynieńnie da rehijona — natatka pra hibiel tak zvanaha namieśnika kiraŭnika akupacyjnaj administracyi Chiersonskaj vobłaści Kiryła Stramavusava. U telehram-kanale taksama byli pasty ab hibieli Stramavusava, evakuacyi cyvilnaha nasielnictva z vobłaści, pra nastup USU. Ab adstupleńni US RF — ni słova.
«Savieckaja Biełarusija»— 0 paviedamleńniaŭ. Navinavy paradak identyčny BiełTA: hibiel Stramavusava, USU nastupajuć, «raźviazka chutka». U telehram-kanale vydańnia pra situacyju pad Chiersonam navin zusim niama. Zatoje jość publikacyja ab tym, jak «ukrainskija ŭciekačy stali instrumientam šantažu ŭ rukach kijeŭskaha režymu».
Ahienctva televizijnych navin (ATN) — 0 paviedamleńniaŭ. Treba adznačyć, što cikavaj była padača naviny ŭ telehram-kanale ATN. Tam niama zhadak ab adstupleńni US RF z Chiersona. Ale tam publikavali infarmacyju ab zajavie hienieralnaha sakratara NATA Jensa Stałtenbierha, što «aljans u kursie zajaŭ pa Chiersonie». Ab jakoj zajavie idzie havorka, prapahandysty nie ŭdakładnili.
Ahulnanacyjanalnaje telebačańnie (ANT) — 0 paviedamleńniaŭ. Tut prapahandysty napisali, što pa zajavie Suravikina «abstanoŭka ŭ rajonie śpiecapieracyi ŭ cełym stabilizavanaja» i «na asobnych napramkach rasijskija vojski adnavili nastupalnyja dziejańni». I nijakaha adstupleńnia, naturalna, niama.
Staličnaje telebačańnie (STB) — 0 paviedamleńniaŭ. Karotkaje abmierkavańnie pakidańnia Chiersona US RF adbyłosia ŭ strymie adnaho z prapahandystaŭ telekanała. Abmiarkoŭvajučy padzieju, prapahandysty syšlisia ŭ mierkavańni, što, u adroźnieńnie ad adstupleńnia z Charkaŭskaj vobłaści, pa situacyi ŭ Chiersonie z hramadstvam viadziecca niejkaja kamunikacyja. Prapahandysty ličać paćviardžeńniem pravilnaści pryniataha rašeńnia toje, što jaho publična padtrymali Kadyraŭ i Pryhožyn.
Adreahavaŭ na navinu i tak zvany palitołah Alaksandr Špakoŭski. Jon zajaviŭ, što «paśla «deeskałacyi» ŭ Kijeŭskaj vobłaści i «pierahrupoŭki» pad Charkavam stała zrazumieła, što zajaŭlenyja mety SVA i padychody da viadzieńnia vajny majuć patrebu ŭ karekciroŭcy, napieradzie zaciažny kryzis». Taksama prapahandyst napisaŭ, što «nijakich adčuvalnych palityčnych nastupstvaŭ dla stabilnaści sistemy kiravańnia ŭ RF adychod rasijskich vojskaŭ z Chiersona nie vykliča».
Takim čynam, biełaruskaja prapahanda saramliva zamaŭčała i praihnaravała navinu ab adstupleńni US RF z Chiersona. Skupa pa temie vykazalisia tolki asobnyja «samastojnyja» prapahandysty. Jak i pry aśviatleńni papiarednich adstupleńniaŭ i vajennych paražeńniaŭ Rasii, u situacyi z Chiersonam biełaruskija prapahandysty nie farmirujuć svajho naratyvu, a prosta zamoŭčvajuć padzieju, u spadziavańni, što jana ad hetaha pierastanie isnavać.
