Minabarony pra drukavańnie błankaŭ dla mabilizacyjnych pozvaŭ: Usio płanava
Dniami ŭ ŚMI źjavilisia paviedamleńni ab tym, što Ministerstva abarony Biełarusi abviaściła tendar na maštabny druk mabilizacyjnych pozvaŭ. Minabarony na heta adreahavała, vystupiŭšy sa śpiecyjalnym paviedamleńniem.
Fota ilustracyjnaje
U svaim paviedamleńni Minabarony kateharyčna abvierhła padrychtoŭku da mabilizacyi.
«U suviazi z pastupajučymi ŭ Ministerstva abarony zvarotami i sprobami niekatorych internet-resursaŭ skazić infarmacyju ab płanavych mierapryjemstvach, jakija pravodziacca vajskovymi kamisaryjatami Respubliki Biełaruś, paviedamlajem.
Zakupka vajskovymi kamisaryjatami roznych formaŭ, błankaŭ i inšaj farmalizavanaj drukavanaj pradukcyi źjaŭlajecca standartnaj štohadovaj praceduraj, jakaja zabiaśpiečvaje płanavuju pracu kamisaryjataŭ», — takaja viersija taho, što adbyvajecca, vykładzienaja ŭ tielehram-kanale Minabarony.
Padkreślivajecca, što «heta pracedura pravodzicca ŭ adpaviednaści ź biełaruskim zakanadaŭstvam na padstavie raniej zaćvierdžanych płanaŭ, a pradmiet zakupki raźmiaščajecca na elektronnaj handlovaj placoŭcy. Usio heta źjaŭlajecca śviedčańniem adkrytaści i dziejnaści ŭ adpaviednaści z płanam vajskovaha viedamstva».
U Minabarony adznačajuć, što «nijakaha pavieličeńnia abjomu zakupnoj pradukcyi ŭ biahučym hodzie ŭ paraŭnańni ź minułymi pieryjadami niama», a «pozvy dla mabilizacyi majuć formu, jakaja adroźnivajecca ad inšych dakumientaŭ». U tym ža vypadku, pra jaki idzie havorka, viadziecca drukavańnie błankaŭ formy, «jakimi vajskovaabaviazanyja vyklikajucca dla ŭdakładnieńnia ŭlikova-prypisnych danych, apaviaščajucca ab zboravych mierapryjemstvach, a taksama dla pryzyvu na terminovuju vajennuju słužbu».
Paviedamleńnie Minabarony źjaviłasia ŭ adkaz na publikacyi ŭ ŚMI infarmacyi ab tendary vajskovaha kamisaryjata Bresckaj vobłaści na drukavańnie 180 tysiač błankaŭ «piersanalnaja pozva mab.», 73 tysiač mabilizacyjnych pradpisańniaŭ vajskovaabaviazanaha, pryznačanaha ŭ kamandu, i 30 tysiač mabilizacyjnych pradpisańniaŭ vajskovaabaviazanaha, jaki pryciahvajecca dla zabieśpiačeńnia mabilizacyi.
