Ci zmožacie vy znajści matulin tort?
«Nie čapaj — heta na śviata!» Ci časta vam davodziłasia čuć takoje, kali vy chacieli pačastavacca smakoćciem, jakoje pryhatavała maci? Prapanujem uspomnić padčas vyrašeńnia hetaj viasiołaj, ale niaprostaj zadačy.
Zadača
Za tydzień da Novaha hoda maci ŭžo pryhatavała tort, jaki vam vielmi chočacca pakaštavać (tak, jon nastolki vydatny, što moža zachoŭvacca tak doŭha).
Jość piać skryniaŭ u rad, i tort chavajecca ŭ adnoj z hetych skryniaŭ. Kožnuju noč matula pieramiaščaje tort u susiedniuju skrynku źleva ci sprava. I kožnuju ranicu ŭ vas jość čas zazirnuć tolki ŭ adnu skryniu, kab pasprabavać znajści łasunak. Vam treba znajści tort za tydzień, bo vy hareza i nie možacie čakać ažno da śviata.
Padkazka
Kali vy prosta praviarajecie adnu skrynku ŭ dzień, pačynajučy z 1 i zakančvajučy 5 zapar, vy možacie nie znajści tort. Jon moža być u skryncy 3, kali vy praviarajecie numar 2 — a na nastupny dzień pieramiaścicca ŭ skrynku 2, u toj čas jak vy budziecie praviarać skrynku 3. Taksama vy nie zmožacie ŭvieś čas praviarać i adnu i tuju ž skrynku, bo niaŭłoŭny tort uvieś čas moža pieramiaščacca — naprykład, tolki miž dźviuma skrynkami, jakija vy nie praviarajecie. Vam patrebny płan, jaki harantuje, što vy znojdziecie tort.
Rašeńnie (u adroźnieńnie ad torta) možacie znajści pad fota.
Fota: Pixabay
Rašeńnie
Vypadkovy pošuk nie harantuje pieramohi. Nie budzie pracavać ni pravierka kožnaj skrynki, ni pravierka adnoj i toj ža skrynki znoŭ i znoŭ. Tut nam pryjdziecca zrabić niekatoryja zdahadki. Naprykład, čysta tearetyčna vykažam zdahadku, što tort znachodzicca ŭ skryncy z cotnymi numarami, heta značyć albo ŭ 2, albo ŭ 4.
Dapuścim, vy praviarajecie numar 2. (Kali vy znojdziecie tort adrazu, to vy pieramahli i žyćcio cudoŭnaje, prynamsi, pakul mama nie pabačyć, što adzin kavałak źjedzieny.) Kali ŭ skryni 2 torta niama, to vy viedajecie, što jon musić być u skryncy 4 (znoŭ ža, heta zasnavana na pieršapačatkovym dapuščeńni pra cotnyja numary).
Kali tort znachodziŭsia ŭ 4-j skryni ŭ pieršy dzień, tady na nastupny jon pavinien byŭ pieramiaścicca albo ŭ 3-ju, albo ŭ 5-ju. Takim čynam, na druhi dzień praviercie numar 3. Kali jaho iznoŭ tam niama, to jon pavinien chavacca ŭ 5-j skryncy. Heta značyć, što na treci dzień tort iznoŭ pieramieścicca ŭ skrynku 4, dzie vy jaho i znojdziecie.
Pryviedzieny vyšej scenar — pravierka skrynak 2, 3 i zatym 4 — zaŭsiody dazvolić vam vyjhravać, kali vykazać zdahadku, što mama pačała hulniu z cotnaj skrynki. Ale, viadoma, heta moža być nie tak. Zaraz davajcie pahladzim na scenar, kali hulnia pačałasia ź niacotnaj skrynki.
Kali tort znachodzicca ŭ skryni 1, 3 abo 5, to na druhi dzień jon pavinien pieramiaścicca ŭ skryniu 2 abo 4. Na treci dzień jon pieramieścicca nazad u skryniu 1, 3 abo 5. I na čaćviorty dzień tort znoŭ musić apynucca albo ŭ 2-j, albo ŭ 4-j skryni.
Ciapier vy možacie adčuć, što my vyjavili niešta važnaje: kali spačatku tort byŭ u skryncy ź niacotnymi numarami, to ŭ pačatku čaćviortaha dnia jon maje być u skryni z cotnymi numarami. Ciapier my pavinny abjadnać dva scenary.
Ź pieršaha prykładu my pamiatajem, što, kali vy praviarajecie numary 2, potym 3, a zatym 4, vy znojdziecie pryz, kali jon pieršapačatkova chavaŭsia pad cotnym numaram. Dapuścim, vy praviarajecie 2, 3 i 4 u pieršyja try dni i nie znachodzicie ničoha. Heta aznačaje, što pieršapačatkova tort chavaŭsia pad niacotnym numaram. I taksama heta aznačaje, što ŭ pačatku čaćviortaha dnia jon pavinien być u poli z cotnymi numarami. Takim čynam, na čaćviorty dzień, kali vy nie znajšli ničoha, vy paŭtarajecie praces, tamu što vy viedajecie, što ciapier tort maje pačać padarožža z cotnaj skrynki.
Takim čynam, voś rašeńnie: praviercie skrynku 2 u pieršy dzień, zatym 3 na druhi dzień i potym 4 na treci dzień. Kali tort byŭ u cotnaj skryncy, vy harantavana znojdziecie jaho ŭ adzin ź pieršych troch dzion. Kali nie znojdziecie, to prosta paŭtarycie praceduru: praviercie skrynku 2 na čaćviorty dzień, potym skrynku 3 na piaty dzień i, narešcie, numar 4 na šosty dzień. Niahledziačy ni na što, vy znojdziecie łasunak.
Dzień atrymaŭsia, tort, jak zvyčajna, — niepieraŭzydzieny, a maci mocna nie złujecca, bo lubić vas.
***
Zahadka pieraroblena z zadańnia ŭ Popular Mechanic.
