Alesia Bialackaha i jahonych kaleh chutka pačnuć sudzić
Hienprakuratura nakiravała ŭ sud kryminalnuju spravu suprać «viasnoŭcaŭ» Alesia Bialackaha, Valancina Stefanoviča i Uładzia Łabkoviča, jakija ŭtrymlivajucca pad vartaj z 14 lipienia 2021 hoda. Pa hetaj ža spravie buduć sudzić u paradku śpiecvytvorčaści i Źmitra Sałaŭjova, piša «Viasna».
Nobieleŭskaha łaŭreata Alesia Bialackaha i jahonych paplečnikaŭ abvinavačvajuć u kantrabandzie (niezakonnym pieramiaščeńni praz mytnuju miažu Jeŭrazijskaha ekanamičnaha sajuza ŭ bujnym pamiery najaŭnych hrašovych srodkaŭ arhanizavanaj hrupaj) pavodle č. 4 art. 228 KK i finansavańni hrupavych dziejańniaŭ, jakija hruba parušajuć hramadski paradak, pavodle č. 2 art. 342 KK.
U pryvatnaści, pravaabaroncam staviacca ŭ vinu:
- apłata štrafaŭ za asobnych ludziej, «pryciahnutych na padstavie sudovych rašeńniaŭ, jakija ŭstupili ŭ zakonnuju siłu, da adkaznaści za administracyjnyja pravaparušeńni, źviazanyja z parušeńniem hramadskaha paradku i ŭstanoŭlenaha na terytoryi krainy paradku kiravańnia; za inšyja pravaparušeńni, učynienyja ŭ suviazi z vyrazam pratestu na dziejańni dziaržaŭnych orhanaŭ Respubliki Biełaruś»;
- vypłaty takim asobam hrašovych kampiensacyj za srodki, zatračanyja imi na apłatu štrafaŭ;
- apłaty zamiest niekatorych asob, «jakija ŭčynili nazvanyja administracyjnyja pravaparušeńni, rachunkaŭ za charčavańnie ŭ miescach adbyćcia spahnańniaŭ u vyhladzie administracyjnych aryštaŭ»;
- apłaty pracy advakataŭ, «u tym liku za abaronu ŭ kryminalnych pracesach šerahu asob, pryznanych padazravanymi i paśla pryciahnutych u jakaści abvinavačanych pa kryminalnych spravach, źviazanych z hrubym parušeńniem hramadskaha paradku, vykazvańniem pratestu na dziejańni dziaržaŭnych orhanaŭ Respubliki Biełaruś».
«Dla infarmacyjnaha supravadžeńnia svajoj dziejnaści jany vykarystoŭvali internet-resursy PC «Viasna» ŭ sacyjalnych sietkach i miesiendžarach», — havorycca ŭ abvinavačvańni.
Data suda pakul nie pryznačanaja. Pravaabaroncam pahražaje ad 7 da 12 hadoŭ źniavoleńnia.
