Z pačatku hoda zvolnili na 65 tysiač čałaviek bolš, čym uziali na pracu
Biełstat apublikavaŭ źviestki ab kolkaści pryniatych na pracu i zvolnienych u studzieni—kastryčniku hetaha hoda. Vyjaviłasia, što ŭ Biełarusi z pačatku hoda zvolnili na 65 tys. čałaviek bolš, čym uziali na pracu, piša Office Life.
Fota ilustracyjnaje
Pavodle Biełstata, za dziesiać miesiacaŭ hetaha hoda na pracu było pryniata 546 656 čałaviek (u minułym hodzie — 575 943 čałavieki), u tym liku na znoŭ stvoranyja pracoŭnyja miescy — 13 874. Za kastryčnik zmahło pracaŭładkavacca 53 596 čałaviek. Samaje aktyŭnaje najmańnie nazirałasia ŭ pramysłovaści, aptovym i roźničnym handli.
Pry hetym u studzieni—kastryčniku 2022 hoda było zvolniena 612 112 čałaviek, u tym liku za kastryčnik — 56 579. Atrymlivajecca, što adtok kadraŭ za dziesiać miesiacaŭ skłaŭ kala 65,4 tys. čałaviek (u 2021 hodzie — 57,9 tys.).
Siarod aficyjnych pryčyn zvalnieńniaŭ pieravažajuć prahuły i inšyja parušeńni pracoŭnaj dyscypliny — 31 322 vypadki, u tym liku ŭ kastryčniku — 2 958. Likvidacyja pradpryjemstva abo skaračeńnie jak aficyjnaja pryčyna značacca značna radziej — u kastryčniku 300 vypadkaŭ, za dziesiać miesiacaŭ — 5 474.
Pry hetym, pa źviestkach taho ž Biełstata, u kastryčniku ŭ ekanomicy było zaniata 4 195,6 tys. čałaviek, što na 1,2 tys. čałaviek bolš, čym miesiacam raniej. Heta byŭ pieršy rost pakazčyka zaniataści za doŭhi čas — uvieś 2022 hod i 2021-y hramadzian, jakija pracujuć u Biełarusi, stanaviłasia mienš.
