«Publikavali zaviedama pazityŭnuju acenku dziejańniaŭ apanientaŭ ułady». Voś u čym vinavaciać Tut.by
Hienieralnaja prakuratura zrabiła spravazdaču, što vyvučyła materyjały spravy Tut.by ŭ dačynieńni da hiendyrektara Ludmiły Čekinaj, hałoŭnaj redaktarki Maryny Zołatavaj, žurnalistaŭ Volhi Łojka, Aleny Tałkačovaj, juryskonsulta Kaciaryny Tkačenka i inšych asob.
Čekinaj inkryminavanyja ŭchileńnie ad vypłaty padatkaŭ, arhanizacyja raspalvańnia varožaści, a taksama raspaŭsiudžvańnie materyjałaŭ z zaklikami da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś.
Zołatava, Łojka i Taŭkačova abvinavačvajucca ŭ dapamozie va ŭchileńni ad vypłaty padatkaŭ, raspalvańni sacyjalnaj varožaści, raspaŭsiudzie materyjałaŭ z zaklikami da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś.
Tkačenka abvinavacili ŭ dapamozie va ŭchileńni ad vypłaty padatkaŭ, aktyŭnym udziele ŭ hrupavych dziejańniach, jakija hruba parušajuć hramadski paradak.
Hienprakuratura śćviadžaje, što servis «Kupi.tut.by» nie źjaŭlaŭsia ŭłasnaj raspracoŭkaj kampanii, tamu prefierencyjami PVT kampanija nibyta karystałasia biespadstaŭna.
Tut.by vinavaciać taksama ŭ tym, što z metaj atrymańnia padatkovych prefierencyj jak rezidenta PVT u 2019 hodzie była ŭkaraniona schiema «drabnieńnia biznesu».
Jak vynik, piša Hienprakuratura, u biudžet u 2019—2021 hadach niedapłačana bolš za 3 młn rubloŭ padatkaŭ.
Tut.by vinavaciać taksama ŭ tym, što ich materyjały ŭtrymlivali
— zaviedama pazityŭnuju acenku dziejańniaŭ apanientaŭ ułady;
— śviadoma niehatyŭnaje adlustravańnie rašeńniaŭ słužbovych asob, inšych hramadzian, jakija vystupali za zachavańnie dziejnaha kanstytucyjnaha ładu;
— utojenuju kaardynacyju pratesnaj aktyŭnaści ŭ hramadstvie;
— źviestki, nakiravanyja na destabilizacyju situacyi ŭ krainie i pryčynieńnie škody nacyjanalnaj biaśpiecy Biełarusi.
Tkačenka ŭ vieraśni 2020 hoda ŭ stalicy ŭdzielničała ŭ hrupavych dziejańniach, jakija hruba parušajuć hramadski paradak, piša Hienprakuratura.
Pa vynikach vyvučeńnia materyjałaŭ kryminalnych spraŭ u dačynieńni da Ludmiły Čekinaj, Maryny Zołatavaj, Volhi Łojki, Aleny Tałkačovaj, Kaciaryny Tkačenka pryniata rašeńnie ab nakiravańni ich u sud.
Hienprakuratura taksama paviedamlaje, što inšyja 9 fihurantaŭ, jakim inkryminavana dapamahańnie va ŭchileńni ad vypłaty padatkaŭ, całkam pryznali vinu, kampiensavali «škodu» i zajavili chadajnictvy ŭ adras Łukašenki ab vyzvaleńni ad kryminalnaj adkaznaści.
