Tancavalnaja lichamanka, tyktok-trendy i vajna — TOP-10 muzyčnych albomaŭ hoda pa viersii «Našaj Nivy»
Čym paradavaŭ słuchačoŭ taki doŭhi i nieadnaznačny hod? «Naša Niva» prapanuje vam pasłuchać dziasiatku najlepšych albomaŭ 2022 hoda.
Beyoncé — Renaissance
U šmatlikich zachodnich rejtynhach najlepšych relizaŭ hoda siomy studyjnik prymadonny amierykanskaha R'n'B zajmaje pieršy radok. I absalutna zasłužana.
Renaissance — heta idealny sakavity saŭndtrek dla taho, kab adpuścić kavidny izalacyjny eskapizm, zakacić viečarynku i puścicca ŭ skoki.
Pryčym jon zachodzić jak pakaleńniu samoj śpiavački, jakoj užo 41, tak i pakaleńniu tyktoka, jakoje achvotna zdymaje roliki pad chity Biejonse.
Bad Bunny — Un Verano Sin Ti
Hety puertarykaniec try hady zapar źjaŭlajecca samym papularnym artystam na płatformie Spotify. Sioleta jaho pieśni słuchali 18,5 miljarda razoŭ.
Adpaviedna, i novy łonhpłej Bad Bunny staŭ samym papularnym albomam hoda. Albom dazvalaje adčuć usiu palitru karybskaha žyćcia — u im jość miesca i kachańniu, i humaru, i sacyjalnym zajavam.
Darečy, u 2024-m Bienita Antonia Marcineza Akasia (tak zavuć śpievaka) možna budzie pabačyć u kino — jon syhraje hałoŭnuju rolu ŭ filmie pra marvełaŭskaha piersanaža El Muerta.
Arctic Monkeys — The Car
The Car možna było b nazvać rok-albomam hoda, kali b nie rezkaja źmiena stylu, jakaja pačałasia ŭ Arctic Monkeys ź minułaha reliza.
U Tranquility Base Hotel & Casino, jaki vyjšaŭ u 2018-m, hurt ad badzioraha indzi pierajšoŭ da aksamitnaha retra-łaunža. U ekśpierymientach ničoha kiepskaha niama, ale druhi taki albom zapeŭnivaje, što heta śviadomaja źmiena stylu.
Arctic Monkeys siońnia — heta vielmi stylovaja muzyka, jakaja patrabuje hłybokaha i nieadnarazovaha prasłuchoŭvańnia.
Fontaines D.C. — Skinty Fia
A ciapier da sapraŭdnaha rok-alboma hoda. Fontaines D.C. daŭno nie žyvuć u rodnaj Irłandyi, ale nie žadajuć hublać suviaź z krainaj, navat D.C. u naźvie hurta aznačaje Dublin City.
Treci albom hurta Skinty Fia — ź irłandskaj heta pierakładajecca jak «Praklaćcie alenia», chacia łonhpłej amal całkam anhłamoŭny — pra pieražyvańni irłandca, jaki žyvie za miažoj. Jaho chvalujuć padziei na radzimie, jon sumuje pa svaim domie i tradycyjach dy sprabuje ich nie zhubić na novym miescy.
Vynik — emacyjnaja płytka, u jakoj možna pačuć frustracyju i miescami navat ahresiju.
Sudan Archives — Natural Brown Prom Queen
Druhi albom jarkaj mastački i muzyki Brytni Parks składana apisać tryma litarami R'n'B. Heta kalejdaskapičnaja sumieś z rytm-n-bluza, chausa, pop-muzyki i chip-chopa, ščodra prypraŭlenaja firmovaj skrypkaj.
Parks u svaim albomie zakranaje temy dušeŭnaha bolu, upeŭnienaści ŭ sabie i indyvidualnaści. Užo ŭ pieršaj ža pieśni alboma jana dekłaruje: «Ja nie zvyčajnaja» («I'm not average»). I ŭ słuchača jość 18 trekaŭ, kab u hetym pierakanacca.
Harry Styles — Harry's House
Jašče adzin tyktok-albom hoda. Kali vy aktyŭny karystalnik sacsietak, to dakładna čuli jak minimum adnu pieśniu z hetaha alboma — As It Was. Navat kali nie viedali, chto jaje śpiavaje.
Heta samaja papularnaja pieśnia sioleta na Spotify — jaje prasłuchali bolš za 1,5 miljarda razoŭ.
Były ŭdzielnik One Direction zdoleŭ zrabić vydatnuju solnuju karjeru — kvitki na jahonyja kancerty raskuplajucca za ličanyja chviliny, a pieśni ŭznačalvajuć čarty. Čym nie nahoda bolš pilna paznajomicca ź jahonym samym asabistym, pa jahonym ža pryznańni, albomam.
Albom hoda z Ukrainy pa viersii «NN»: Palindrom — Pridumano v Čierzi
Amal uvieś hod my žyviom u realijach vajny va Ukrainie, u jakuju akazałasia ŭciahnutaj i Biełaruś. Trahičnyja padziei naradzili nie adzin mastacki tvor, i abminuć uvahaj heta było nielha.
«Oj u łuzi čiervona kalina». Hałoŭnyja pieśni ŭkrainskaha zmahańnia AŬDYJA
Repieru Ściapanu Burbanu 28 hadoŭ. Jon naradziŭsia i vyras u Lvovie, udzielničaŭ u roznych rep-kalektyvach, a z 2019 hoda vystupaje solna pad imiem Palindrom.
U svajoj tvorčaści Palindrom daśleduje ŭłasny i kalektyŭny traŭmatyčny dośvied: «savok» i jaho estetyku, rodny Lvoŭ i źmieny ŭ im, zasille Rasii va ŭkrainskaj kultury, a taksama, viadoma, vajnu i śmierci.
Składana pavieryć, ale amal usie pieśni byli zapisanyja da 24 lutaha.
Florence + the Machine — Dance Fever
Niahledziačy na nazvu «Tancavalnaja lichamanka», novy albom Fłorens Uełč nie prymusić vas tancavać. U astatnim — heta ŭsio taja ž vytančanaja i fantastyčna pryhožaja muzyka pad niepaŭtorny vakał rudavałosaj brytanki.
Nazva ž alboma adsyłaje da fienomiena chareamanii — siaredniaviečnaj psichičnaj epidemii, jakaja vyhladała jak hrupavy taniec da źniamohi. Padčas izalacyi Fłorens Uełč daviedałasia pra chareamaniju i zacikaviłasia hetaj temaj.
U piaty albom svajho hurta śpiavačka nibyta ŭniesła ŭsie svaje emocyi, jakija padčas pandemii jana nie zmahła dać słuchačam z-za admieny kancertaŭ. Dance Fever — mahčyma, nie najlepšy reliz u dyskahrafii Florence + the Machine, ale heta vielmi dobraja praca, vartaja miesca ŭ našaj dziasiatcy.
Rosalía — Motomami
Katałanskaja zorka asensavała ŭłasnuju vieličyniu i na svaim trecim solnym albomie śmieła hulajecca z žanrami, stvarajučy svoj ułasny.
Razalija čarhuje karotkija treki z paŭnavartasnymi pieśniami, bałady — z tancavalnymi numarami, a taksama ŭplataje ŭ albom rehieton i fłamienka.
Kali vy nie baiciesia stamicca ad vandroŭki pa žanrach, to śmieła słuchajcie adzin z hałoŭnych jeŭrapiejskich relizaŭ 2022-ha.
Biełaruski albom hoda pa viersii «NN»: Śvieta Bień, Hala Čykis — Prijom!
Biełarusy treci hod žyvuć u atmaśfiery, u jakoj niščycca ŭsio stvaralnaje. Da hetaha dadałasia vajna ŭ blizkaj nam krainie.
Tym bolš kaštoŭnyja lubyja ajčynnyja relizy. U śniežni śpiavački Śviatłana Bień i Hala Čykis vypuścili vielmi asabisty albom.
«9 piesień i 1 vierš, u jakich jość uvieś śpiektr emocyj: ad bieznadziejnaj rospačy da adčajnaj nadziei. Brakuje tolki adnoj — viesiałości, da adsutnaści jakoj, zdajecca, usie ŭžo pačali pryvykać.
Ale radaść jość. Ci chacia b čakańnie toj samaj radaści, kali siarod zichatlivaj pustaty i apramietnaj ciemry na tvoj sihnał adhukajecca niechta inšy. I ty ŭžo nie adzin. A jość užo dvoje, a moža, i našmat bolš, i jany trymajucca na hetaj chvali, niahledziačy na štorm i ŭrahan navokał», — tak vielmi jomka apisali svaju pracu sami jaje stvaralnicy.
A što vy słuchali ŭ 2022-m? Napišycie ŭ kamientarach.
dyk aŭtar ža Siamion Cybulski. tak by srazu i skazali
a čyvo eta ŭ etaj, što ŭ šlomie, na nazie narysovata? nie šarykam, a ałoŭkam