Litoŭski teatr opiery i baleta prybraŭ tvory rasijskich kampazitaraŭ. Zamiest «Ramea i Džuljety» pakažuć «Barbaru Radzivił»
Litoŭski Nacyjanalny teatr opiery i baleta (ŁNTOB) paviedamlaje, što mianiaje repiertuar, admaŭlajučysia ad tvoraŭ ruskich kłasikaŭ. 10, 11 i 14 lutaha zamiest «Ramea i Džuljety» Siarhieja Prakofjeva pakažuć balet «Barbara Radzivił», a 23, 24 i 25 lutaha zamiest «Viasny» Ihara Stravinskaha — balet «Praces», paviedamlaje Delfi.lt.
Balet «Barbara Radzivił». Fota: Delfi
«Abodva balety — viadomyja tvory nacyjanalnaj sceny. Balet Anžaliki Cholinaj «Barbara Radźvił» paśpiachova źbiraje poŭnyja zały ŭžo 12-y siezon — ź viasny 2011 hoda. Kvitki na hety balet kupić nialohka. U balecie hučyć muzyka Stasisa Vajniunasa, Arvidasa Małcysa i inšych kampazitaraŭ, aŭtar scenahrafii — mastak Maryjus Jacoŭskis, mastak pa kaściumach — Juozas Statkiavičus.
«Praces» — debiutny śpiektakl Marcinasa Rymiejkisa — publika ŭpieršyniu ŭbačyła ŭ śniežni 2017 hoda. Scenahrafiju da baleta pavodle ramana Franca Kafki «Praces» stvaryŭ Maryus Jacoŭskis.
«Prynosim prabačeńni hledačam, jakija zahadzia kuplali kvitki na vyšejzhadanyja śpiektakli, ale ŭbačać inšyja. Adnak ŁNTOB vyrašyŭ uličyć rekamiendacyju Minkulta i časova, da zakančeńnia vajny va Ukrainie, ustrymacca ad publičnych pakazaŭ tvoraŭ ruskich aŭtaraŭ, pakolki ŭ Rasii kultura ciesna źviazana z ahresiŭnaj palitykaj hetaj krainy. Ab hetym, źviartajučysia da suśvietnaj kulturnaj supolnaści, prasiŭ i ministr Ukrainy Alaksandr Tkačenka. My spadziajomsia na razumieńnie hledačoŭ ŁNTOB i ich padtrymku, tym bolš, što zamiest baletaŭ, ad jakich my admaŭlajemsia, my pakažam lubimyja publikaj śpiektakli», — skazała pradstaŭnik ŁNTOB Jurhita Skietycie-Narvajšenie.
