Prablemy biełaruskaha biznesu za miažoj abmiarkujuć na forumie ŭ Davosie — možna dasłać svaje prapanovy
U najbujniejšym suśvietnym ekanamičnym forumie, jaki ładzicca ŭ Davosie 16-20 studzienia, voźmie ŭdzieł delehacyja Asacyjacyi biełaruskaha biznesu za miažoj ABBA dla abmierkavańnia ŭ partniorstvie sa Śviatłanaj Cichanoŭskaj prablem biełaruskich biznesmienaŭ za miažoj. Siarod pytańniaŭ — vizy, bankaŭskaje absłuhoŭvańnie, dostup da finansavańnia i prahram padtrymki, lehalizacyja.
Fota: World Economic Forum
U forumie ŭdzielničajuć lidary 52 dziaržaŭ i kala 600 hiendyrektaraŭ mižnarodnych kampanij i karparacyj. Biełaruskija delehacyi nie zaprašali da ŭdziełu ŭ Davoskim ekanamičnym forumie z 1992 hoda, kali Biełaruś pradstaŭlaŭ Stanisłaŭ Šuškievič.
Ciapier delehacyju na forumie ŭznačalić Śviatłana Cichanoŭskaja, jakuju zaprasili vystupić na hałoŭnaj scenie.
19 studzienia ŭ ramkach Davoskaha forumu adbudziecca panelnaja dyskusija na temu biełaruskaha biznesu i ekanamičnaj pierśpiektyvy dla biełarusaŭ. Upieršyniu ŭ historyi Davosa heta dyskusija całkam pryśviečanaja Biełarusi. Na joj Śviatłana Cichanoŭskaja padzielicca bačańniem demakratyčnych sił pa raźvićci i padtrymcy pryvatnaha siektara Biełarusi i budučych ekanamičnych reformaŭ. Pradstaŭniki delehacyi ABBA vystupiać z dakładami ab stanie biełaruskaha biznesu za miažoj, abaznačać hałoŭnyja prablemy i prapanujuć šlachi ich vyrašeńnia.
Dla bolš poŭnaha abmierkavańnia na forumie, ABBA prosić biznecoŭcaŭ, jakija sutyknulisia z dyskryminacyjaj pry viadzieńni biznesu za miažoj, napisać pra heta na elektronny adras [email protected].
Usie zvaroty buduć praanalizavany i najbolš častyja pytańni buduć vyniesieny na abmierkavańnie z zamiežnymi partniorami, pradstaŭnikami dziaržaŭnych orhanaŭ i dziełavych ustanoŭ.
