Na dachach damoŭ u Maskvie zaŭvažyli vajskovuju techniku
U sacyjalnych sietkach 19 studzienia źjavilisia niekalki videazapisaŭ i fotazdymkaŭ, na jakich, jak śćviardžajecca, pakazany zienitnyja rakietna-harmatnyja kompleksy «Pancyr-S1», ustalavanyja na dachach niekalkich budynkaŭ u Maskvie. Sapraŭdnaść apublikavanych materyjałaŭ nie paćvierdžanaja, ale jany šmatlikija i publikujucca resursami roznych aryjentacyj, piša «Mieduza».
Telehram-kanał Moscow calling raspaŭsiudziŭ niekalki videazapisaŭ, na jakich, jak śćviardžajecca, pakazany momant ustanoŭki ZRPK «Pancyr-S1» na domie 8 u Ciacierynskim zavułku (budynak pa hetym adrasie na «huhł-kartach» padobny da budynka na videazapisach). Jašče ŭ adnym roliku, śćviardžaje kanał, ZRPK staić na dachu doma.
Rasijskija telehram-kanały, u tym liku niekalkich «vajenkaraŭ», a taksama zachodnija OSINT-śpiecyjalisty, jak adznačaje «Ahienctva», apublikavali fatahrafiju budynka Ministerstva abarony RF na Frunzienskaj nabiarežnaj, dzie, jak śćviardžajecca, taksama pastavili «Pancyr-S1».
U pačatku hetaha tydnia ŭ rasijskich telehram-kanałach taksama vykłali fatahrafii zienitnych rakietnych kompleksaŭ S-400, jakija źjavilisia ŭ rajonie nacyjanalnaha parku «Łasiny vostraŭ» i na vopytnych palach Cimirazieŭskaj sielhasakademii ŭ Maskvie. «Sirena» paviedamlaje, što ŭ «Łasinym vostravie» vysiekli drevy, kab stvaryć placoŭku dla ZRK.
Ułady Maskvy, a taksama Ministerstva abarony RF pakul nie kamientavali hetyja paviedamleńni.
