U Biełaviežskaj puščy padličyli ŭsich zubroŭ
U puščy žyvuć 703 zubry. Kolkaść samak bolšaja, čym samcoŭ. Takija vyniki navukova-daśledčych rabot pa hetych žyviołach za 2022 hod.
Viadomaja taksama kolkaść zubroŭ pa katehoryjach. Darosłych žyvioł 519 asobin (73,8%), maładniaku ad hoda z pałovaj da troch z pałovaj hadoŭ — 107 (15,2%), zubroŭ, narodžanych u hetym hodzie — 77 asobin (11,0%). Siarod połasaśpiełych asobin samki pieravažajuć nad samcami (57,2 i 16,6% adpaviedna).
Takim čynam, na adnaho darosłaha samca prychodzicca try-čatyry samki. Takija suadnosiny zachoŭvalisia i ŭ 2021 hodzie. Za 2022 hod źmianšeńnie ŭ papulacyi skłała 71 asobinu (10,1% ad studzieńskaj kolkaści). Siarod ich 43 zubry zahinuli i 28 — zabili šlacham sielekcyjnaha adstrełu.
Značnaje naturalnaje źmianšeńnie kolkaści zubroŭ abumoŭlenaje hibiellu 24-ch zubroŭ pry pierachodzie voziera pablizu vioski Novy Dvor (pravalilisia pad lod). Pry hetym nie vybralisia ź ledzianoj vady pieravažna maładyja zubry — cialaty i maładniak ad 1 hoda da 3,5 — 21 asobina. Astatnija pryčyny hibieli adzinkavyja: zachvorvańni močapałavoj sistemy ŭ samcoŭ, źniasileńnie, fizijałahičnaja staraść, brakańjerstva.
