ZŠA ŭhavorvajuć Turcyju spynić ekspart sankcyjnych tavaraŭ u Rasiju
Na dumku ZŠA, Turcyja ŭ abychod sankcyj pastaŭlaje Rasii chimikaty, mikračypy i inšuju pradukcyju, jakaja moža być vykarystanaja ŭ vajnie suprać Ukrainy, piša TASS.
Brajan Nelsan, vysokapastaŭleny čynoŭnik Kaznačejstva ZŠA, jaki ažyćciaŭlaje nahlad za vykanańniem sankcyj, sustreŭsia ŭ Ankary i Stambule z pradstaŭnikami tureckich uładaŭ i pryvatnaha biznesu i zaklikaŭ ich da bolš ciesnaha supracoŭnictva z Vašynhtonam u pytańniach handlovych adnosin z Rasijaj.
Vašynhton zaniepakojeny tureckim ekspartam krainie-ahresaru, abjomy jakoha dasiahajuć dziasiatkaŭ miljonaŭ dalaraŭ, skazaŭ Nelsan.
Turecki bok zajaŭlaje, što choć u cełym vystupaje suprać antyrasijskich sankcyj, ale budučy krainaj NATA, vykonvaje ich i prosić ZŠA dać padstavy dla svaich padazreńniaŭ.
Ahienctva Reuters sa spasyłkaj na spravazdačy rasijskaj mytni piša, što za pieršyja siem miesiacaŭ vajny va Ukrainie ŭ Rasiju, niahledziačy na sankcyi, pastupiła mikraschiem i inšych elektronnych kampanientaŭ zachodniaj vytvorčaści na sumu, jakaja pieravyšaje 2,6 młrd dalaraŭ.
Hetyja mikraschiemy paźniej byli vyjaŭlenyja na niekatorych rasijskich sistemach uzbrajeńnia.
Zachad ličyć, što asnoŭnymi kanałami ekspartu ŭ Rasiju ŭ abychod sankcyj źjaŭlajucca Turcyja i Hankonh.
