Zialenski pazbaviŭ hramadzianstva palitykaŭ koła Janukoviča, jaki majuć rasijskaje hramadzianstva
Prezident Ukrainy Uładzimir Zialenski pazbaviŭ ukrainskaha hramadzianstva šerah adyjoznych palitykaŭ časoŭ Viktara Janukoviča, jakija majuć rasijskaje hramadzianstva, paviedamlaje «Ukrainskaja praŭda».
Były ministr adukacyi Dźmitryj Tabačnik. Fota: Ministerstva adukacyi Ukrainy
Siarod asob, pazbaŭlenych ukrainskaha hramadzianstva, — eks-sakratar Rady nacyjanalnaj biaśpieki i abarony Andrej Klujeŭ, eks-ministr adukacyi Dźmitryj Tabačnik, były ministr dachodaŭ i zboraŭ Alaksandr Klimienka, eks-kiraŭnik MUS Vital Zacharčanka, eks-kiraŭnik SBU Alaksandr Jakimienka. Taksama ŭ śpis patrapiŭ ciapierašni deputat ad apazicyjnaj płatformy «Za žyćcio» Adeskaj haradskoj rady Viktar Baranski i inšyja. Usie asoby sa śpisa majuć rasijskaje hramadzianstva.
Hetuju infarmacyju paćvierdziŭ kiraŭnik praŭładnaj frakcyi «Słuha naroda» ŭ Viarchoŭnaj Radzie David Arachamija. Jon adznačyŭ, što Zialenski pazbaviŭ hramadzianstva Ukrainy «zdradnikaŭ, jakija byli adnymi sa słupoŭ režymu Janukoviča», siarod jakich Andrej Klujeŭ, Dźmitryj Tabačnik, Alaksandr Klimienka, Vital Zacharčanka, Alaksandr Jakimienka i «mienš publičnyja ludzi ź ich palityčnaj arbity».
«Nastupnym krokam budzie nakładańnie na ich sankcyj, aryšt i kanfiskacyja na karyść dziaržavy ŭsioj ich majomaści, karparatyŭnych pravoŭ i inšych aktyvaŭ», — zajaviŭ Arachamija.
