Jak maładyja ludzi šukajuć siabroŭ u sučasnym śviecie
Dla starejšaha pakaleńnia praca była adzinym miescam suviazi ź inšymi ludźmi. Paśla pandemii ŭsio bolš ludziej pierajšło na addalenuju pracu. Biez ofisaŭ maładym ludziam davodzicca vynachodzić novyja sposaby, kab zavodzić siabroŭ, piša BBC.
Fota: John Schnobrich / Unsplash
Zavodzić siabroŭ u pačatku karjery vielmi važna, asabliva dla ludziej u novym horadzie, u jakich niama nijakich suviaziaŭ. Siabry dapamahajuć nam padčas kryzisaŭ na pracy i ŭ asabistym žyćci, časam jany zastajucca padtrymkaj na ŭsio žyćcio. U darosłyja hady znachodzić siabroŭ składaniej, čym u maładości, adnak daśledčyki śćviardžajuć, što ciapierašniaj moładzi prychodzicca nie mienš składana — asabliva tak zvanamu «pakaleńniu Z», narodžanamu z 1997-ha pa 2012-ty.
U mnohich z hetych maładych ludziej nie było ci niama mahčymaści zavieści tryvałyja siabroŭskija suviazi. Pa-pieršaje, na ich mocna paŭpłyvali abmiežavańni padčas pandemii ŭ 2020-2021 hady: znachodzić novych siabroŭ tady było vielmi składana, tamu ŭsie siabroŭskija supołki razvalvalisia ci skaračalisia. Pa-druhoje, paślapandemijny trend na vydalenuju ci hibrydnuju pracu — taksama nie paspryjaŭ ustalavańniu nadziejnych suviaziaŭ.
Kreatyŭnyja padychody da pošuku siabroŭ
Maładyja ludzi vynachodziać novyja sposaby zaviadzieńnia znajomstvaŭ.
Łos-andželeskaje ahienctva pa daśledavańni rynku Talk Shoppe ŭziało intervju ŭ milenijałaŭ i zumieraŭ pra ich stasunki ź siabrami padčas pandemii.
Staršy mieniedžar daśledavańnia Džojs Čuinkam vyjaviŭ, što pakaleńnie Z bolš adkrytaje da pošuku novych siabroŭ u internecie z dapamohaj takich srodkaŭ, jak mabilny dadatak Bumble BFF i hrupy pa intaresach u fejsbuku. Adnak mabilnyja dadatki mnohich adšturchoŭvajuć, bo jany časta pryśpiešvajuć sustreču sam-nasam — heta vyklikaje tryvohu, jak pierad pieršym spatkańniem, adznačyli ŭdzielniki daśledavańnia. Pakaleńnie Z adčuvała, što ich šancy zavodzić siabroŭ byli vyšejšyja, kali jany znajomilisia praz hrupy ŭ fejsbuku, jakija časta stvarajucca vakoł ahulnych zachapleńniaŭ, a taksama ŭjaŭlajuć «bolš zručny sposab paznajomicca ź ludźmi», čym adnosiny tet-a-tet u mabilnych dadatkach.
Najaŭnyja internet-srodki naładžvańnia kantaktaŭ dapamahajuć nie ŭsim zumieram. Tamu niekatoryja ź ich stvaryli ŭłasnyja prahramy.
Naprykład, u 2020 hodzie Džejmi Li, na toj čas studentka Kałumbijskaha ŭniviersiteta ŭ Ńju-Jorku, vučyłasia dystancyjna i šukała pa-sapraŭdnamu ščyrych znosin sa svaimi adnahodkami. Tym letam jana zapuściła beta-viersiju taho, što paśla stała jaje dadatkam Flox, dzie hrupy siabroŭ mahli zarehistravacca razam, kab sustrecca ź inšymi hrupami siabroŭ. Dla Li zdavałasia bolš naturalnym sposabam padychodzić da znajomstvaŭ takim čynam. Jak jana skazała veb-sajtu technałahičnych navin TechCrunch, ludzi, jak praviła, bolš naturalna pavodziać siabie ź siabrami, jakija ŭ ich užo jość. Znajomstva z novymi ludźmi ŭ hrupie dazvolić im być samimi saboj i pazbavić niervavańnia ŭ pracesie zaviazvańnia novych stasunkaŭ.
Marysa Mejz ź Ńju-Jorka stvaryła ŭłasny anłajn-chab dla pošuku siabroŭ. Hetaja, ciapier nacyjanalnaja, hrupa sustreč No More Lonely Friends uźnikła letam 2021-ha. Tady 23-hadovaja dziaŭčyna natrapiła na videa ŭ TikTok, u jakim nieznajomiec papiaredziŭ Marysu pra toje, što jaje siabry płanujuć naŭmysna zładzić viečarynku bieź jaje. Kab znajści novych — i lepšych — siabroŭ, Mejz stvaryła svoj servis — anłajn-formu, praź jakuju ludzi mohuć zarehistravacca dla ŭdziełu ŭ sustrečach, jakija jana ładzić. Zaraz dziaŭčyna choča pašyryć płatformu da taho, kab jana pracavała i za miažoj.
Jakim by zručnym miescam dla znajomstvaŭ ni byŭ internet, pryvabnaść sustrečy ŭžyvuju dla mnohich nie słabieje. Paśla taho, jak 23-hadovy Pranaŭ Ajer skončyŭ kaledž u Fiładelfii (ZŠA) u 2020 hodzie, jon pierajechaŭ u horad u Zachodnim Merylendzie, kab pracavać u łabaratoryi, ale praca była całkam addalenaj. «Ja nie dumaju, što adčuvaŭ siabie pa-sapraŭdnamu blizkim z kim-niebudź … Moža być, raz na tydzień ja sustrakaŭsia z paraj inšych ludziej z łabaratoryi, ale na hetym usio», — kaža jon. «Takim čynam, bolšuju častku tydnia ja prosta siadzieŭ za svaim kampjutaram».
Zamiest taho kab zavodzić novych siabroŭ tam, dzie jon žyŭ, Ajer abraŭ inšy padychod: jon rehularna viartaŭsia ŭ Fiładelfiju, kab umacavać koła znosin, jakoje ŭtvaryłasia ŭ jaho ŭ kaledžy. Choć addalenaja praca nie dazvalała jamu zavodzić novych siabroŭ u svajoj łabaratoryi, jana dazvalała jamu pracavać dzie zaŭhodna, tamu jon moh zastavacca ŭ Fiładelfii padoŭhu.
Siabroŭstva ŭ śviecie postpandemii
Pošuk značnych siabroŭskich adnosin, jakija stymulujuć raźvićcio i pašyrajuć haryzonty, — važny dośvied dla kožnaha maładoha čałavieka, jon upłyvaje na ŭsio astatniaje žyćcio. U junactvie ludzi namahajucca zrazumieć, chto jany jość, i kamuści siabry mohuć dapamahčy stać značna lepšym.
«My bačym siabie praz našych siabroŭ, i možam zrazumieć, jakija my, kali dumajem i havorym pra našych siabroŭ», — kaža Dženis MakKiejb, asacyjavany prafiesar sacyjałohii Dartmuckaha ŭniviersiteta.
U rešcie rešt, z-za taho, što zumiery «nie mieli dośviedu zavodzić novych siabroŭ na pracy, na što jany sapraŭdy mahli b abapiracca, kab adčuvać siabie sacyjalna źviazanymi», maładyja ludzi karennym čynam mianiajuć svaje padychody da taho, jak jany stasujucca pamiž saboj, kaža Miryjam Kirmajer, kliničny psichołah i ekśpiert pa siabroŭstvie z Manreala (Kanada). Hetyja źmianieńni taksama paŭpłyvali na tradycyjnuju ideju pra toje, što praca funkcyjanuje jak «centr siabroŭstva i sacyjalnych suviaziaŭ».
Ciapier maładyja ludzi vučacca zručnym anłajn-mietadam znajomstva z novymi ludźmi, a mahčymaść pracavać addalena dazvalaje im naviedvać svaich siabroŭ u roznych kutkach śvietu — zamiest taho, kab być pryviazanymi da peŭnaha sacyjalnaha asiarodka. «Tak, im moža być ciažka z-za siońniašnich niestabilnych realij, ale kali chtości i zdolny vychavać ich u śviecie, jaki źmianiŭsia, dyk heta jany sami», — kaža Džojs Čuinkam.
![Клас Клас](https://dcsfxzu8xls6u.cloudfront.net/images/reactions/reaction-like.png)
![Панылы сорам Панылы сорам](https://dcsfxzu8xls6u.cloudfront.net/images/reactions/reaction-facepalm.png)
![Ха-ха Ха-ха](https://dcsfxzu8xls6u.cloudfront.net/images/reactions/reaction-smile.png)
![Ого Ого](https://dcsfxzu8xls6u.cloudfront.net/images/reactions/reaction-omg.png)
![Сумна Сумна](https://dcsfxzu8xls6u.cloudfront.net/images/reactions/reaction-sad.png)
![Абуральна Абуральна](https://dcsfxzu8xls6u.cloudfront.net/images/reactions/reaction-anger.png)