Što za čałaviek pakinuŭ u spadčynu Valeryju Załužnamu miljon dalaraŭ? I kaho jon adznačyŭ jašče?
24 studzienia hazieta The New York Times miž inšym paviedamiła, što hałoŭnakamandujučy Uzbrojenych sił Ukrainy Valeryj Załužny atrymaŭ u spadčynu miljon dalaraŭ ad amierykanca ŭkrainskaha pachodžańnia Hryhoryja Ściepanca i pieradaŭ usiu sumu na patreby armii. Hazieta tady nie ŭdakładniła, kim byŭ Ściepaniec i jak jon byŭ źviazany z Załužnym. Ciapier žurnalisty daviedalisia pra heta bolš.
Hryhoryj Ściepaniec naradziŭsia ŭ Vińnicy ŭ 1938 hodzie. Jaho baćka byŭ zabity niemcami padčas Druhoj suśvietnaj vajny. Chłopčyka z maci evakuiravali na Urał, viarnulisia dachaty jany tolki paśla zakančeńnia vajny.
Paśla škoły Hryhoryj vučyŭsia ŭ Maskvie, skončyŭ MDU, dzie atrymaŭ vyšejšuju adukacyju pa matematycy i pa chimii, a taksama vučonuju stupień kandydata chimičnych navuk. Pracavaŭ u navucy (NDI hieafiziki), ale byŭ zvolnieny paśla taho, jak padpisaŭ list u padtrymku dysidentaŭ.
Hryhoryj Ściepaniec u junactvie. Fota: Vińnicia cikava / Facebook
Ściepaniec doŭha sprabavaŭ źjechać z SSSR, adnak jaho nie vypuskali. Pakinuć krainu ŭdałosia tolki paśla prychodu da ŭłady Michaiła Harbačova. Z 1989 hoda Ściepaniec žyŭ u amierykanskim horadzie Redmand (štat Vašynhton) i pracavaŭ u kampanii Microsoft prahramistam. Hety čałaviek havaryŭ na ŭkrainskaj, ruskaj, niamieckaj, italjanskaj i anhlijskaj movach.
Hryhoryj Ściepaniec u maładości. Fota: Vińnicia cikava / Facebook
Hryhoryj Ściepaniec pamior u kastryčniku 2022 hoda, usiaho na dzień pieražyŭšy svaju žonku Ału. U ich zastalisia dačka, unuk i praŭnuk.
Załužny akazaŭsia nie adzinym spadčyńnikam, jakoha Ściepaniec paznačyŭ u zaviaščańni. Jašče miljon dalaraŭ jon zaviaščaŭ Armii abarony Izraila (CACHAŁ) i pa 2 miljony — dvum ukrainskim univiersitetam: Kijeva-Mahilanskaj akademii ŭ Kijevie i Ukrainskamu katalickamu univiersitetu (UKU) u Lvovie.
Pradstaŭniki abiedźviuch VNU paćvierdzili hetuju infarmacyju. Prarektarka UKU Natalla Klimoŭskaja zajaviła, što ŭniviersitet jašče nikoli nie atrymlivaŭ takich bujnych achviaravańniaŭ, tym bolš ad nieznajomaha donara. Na što nakiravać hrošy, vyrašyć naziralnaja rada VNU.
«My dumajem, što hety fakt, što spadar Ryhor pieraličyŭ hrošy Załužnamu i na adukacyju, śviedčyć, što jon baleŭ za Ukrainu, za jaje ciapierašnich lidaraŭ i za vychavańnie novych, jakija buduć adnaŭlać jaje ŭ budučyni», — skazała Klimoŭskaja.
Akramia taho, Ściepaniec chacieŭ padtrymać ukrainskuju movu i kulturu, tamu siarod naščadkaŭ paznačyŭ jašče i ansambl staradaŭniaj muzyki «Chareja kazackaja». Ściepaniec zaviaščaŭ srodki kožnamu ŭdzielniku ansambla asobna, u tym liku i siamji ŭdzielnika kalektyva Danidy Piarcova, jaki pamior u 2021 hodzie ad karanavirusa. Kankretnyja sumy pakul nie viadomyja.
Čytajcie taksama:
ŚMI: Załužny atrymaŭ u spadčynu miljon dalaraŭ i achviaravaŭ jaho USU
