«Ludzi nazyvajuć nas ruskimi terarystami». U Aŭstryi samalikvidujecca hurt Russkaja
Na fonie vajny Rasii suprać Ukrainy papularny aŭstryjski hurt Russkaja abviaściŭ pra zakryćcio prajekta. Jak adznačajecca ŭ zajavie, apublikavanaj na aficyjnaj staroncy hurta ŭ fejsbuku 3 lutaha, «vajna va Ukrainie, raspačataja Rasijaj 24 lutaha 2022 hoda, robić niemahčymym dla nas praciahvać padtrymlivać imidž i styl, jaki satyryčna vykarystoŭvaje savieckija simvały i movu», piša Deutsche Welle.
Na dumku muzykaŭ,
«hetaja vajna nie spynicca ŭ najbližejšy čas, i navat kali b jana spyniłasia, saviecki vobraz i styl apynulisia nazaŭždy tabujavanymi».
Taksama vykanaŭcy zajavili, što aścierahajucca za svaju biaśpieku, bo:
«Ludzi nazyvajuć nas ruskimi terarystami i prarasijskimi, navat kali my źjaŭlajemsia poŭnaj supraćlehłaściu».
Hurt, u skład jakoha ŭvachodziać šeść mužčyn i adna žančyna, byŭ zasnavany 18 hadoŭ tamu aŭstryjskim muzykam i akcioram ruska-hruzinskaha pachodžańnia Hieorhijem Makacaryja, jaki z 1989 hoda žyvie ŭ Vienie. U svajoj muzycy Russkaja sumiaščaje elemienty polki, ska, fanfar, roku i ruskaj narodnaj muzyki.
Paśla pačatku vajny va Ukrainie kalektyŭ pierapisaŭ teksty piesień, u jakich zvyčajna źmiašanyja ruskaja, niamieckaja i anhlijskaja movy, publična asudziŭ ahresiju Rasii i padtrymaŭ Ukrainu. «Toje, što adbyvajecca ciapier, — heta katastrofa, i my asudžajem hetuju varjackuju vajnu», — zajaviŭ Hieorhij Makacaryja.
