U Litvu pryjechali rasijskija i biełaruskija tenisisty, ich chočuć abviaścić «niepažadanymi»
Niekalki tenisistaŭ z Rasii i Biełarusi hetymi dniami biaruć udzieł u turniry-«čelendžary» ŭ Vilni, niahledziačy na toje, što Litva ciapier viadzie kampaniju za adchileńnie rasijskich i biełaruskich spartoŭcaŭ ad udziełu ŭ Alimpijskich hulniach 2024 hoda. U prafiesijnym tenisnym turniry «Kubak Vitasa Hierułajcisa» biaruć udzieł rasijanin Jaŭhien Danski, a taksama biełarusy Ivan Lutarevič i Jahor Hierasimaŭ, paviedamlaje radyjo LRT. I ŭ hetym jość palityčnaja prablema.
Tenisny kort u Vilni. Fota: sebarena.lt
Ramunas Hrušas, kiraŭnik Litoŭskaj tenisnaj asacyjacyi, kaža, što vyklučyć spartsmienaŭ ź liku ŭdzielnikaŭ niemahčyma z-za pravił Mižnarodnaj fiederacyi tenisa, jakija dazvalajuć rasijanam i biełarusam zajaŭlacca ŭ niejtralnym statusie. Jon sam byŭ by tolki rady, kab ich zabaranili, ale zrabić niešta moža tolki ŭrad krainy.
Śpikier siejma Litvy, Viktoryja Čmilicie-Nilsen, da pachodu ŭ palityku šachmatystka-hrasmajstarka, miarkuje, što takija spartsmieny pavinny być abvieščanyja niepažadanymi ŭ Litvie.
«Adzin z samych składanych sposabaŭ — źviarnucca ŭ Ministerstva zamiežnych spraŭ i razhledzieć mahčymaść vyklučeńnia taho ci inšaha spartsmiena, abviaściŭšy ich niepažadanymi», — skazała jana.
Na minułym tydni ministry sportu krain Bałtyi i Polščy vyrašyli źviarnucca da mižnarodnych spartyŭnych fiederacyj i Mižnarodnaha alimpijskaha kamiteta z zaklikam vyklučyć rasijskich i biełaruskich spartsmienaŭ ź mižnarodnych spabornictvaŭ.