Paśla pierasiačeńnia biełaruskaj miažy mašyny ź Jeŭropy «hublajuć» dziasiatki tysiač kiłamietraŭ. Jak pradaŭcy padmanvajuć z prabieham aŭto
Častka mašyn pradajecca sa źmienienymi pakazčykami prabiehu. Jak pakazvaje praktyka, niekatoryja ź ich paśla traplańnia ŭ Biełaruś hublajuć sotni tysiač kiłamietraŭ prabiehu.
Skručvajuć prabieh u 2—3 razy
Pra toje, što ŭ Biełarusi pradajecca niamała aŭtamabilaŭ sa skručanym prabieham, viedaje ledź nie kožny aŭtaamatar, adnak nie ŭsie ŭjaŭlajuć, što realny prabieh moža być navat u niekalki razoŭ bolšy, čym u abjavie i na paneli pryboraŭ.
Skrynšot sajta av.by
Tak, naprykład, u Minsku vystaŭlena na prodaž Honda HR-V 2019 hoda vypusku. Apisańnie aŭtamabila pačynajecca sa słoŭ: «Vydatny stan, biez prabiehu pa RB». Mašynu pradajuć z zajaŭlenym prabieham 72 170 km.
Skrynšot sajta vf.vin
U toj ža čas na momant prodažu ŭ śniežni 2022 hoda praz aŭkcyjon u Niderłandach prabieh hetaj Honda składaŭ 154 791 km. Vyhladaje, što pry skrutcy niechta vyrašyŭ doŭha nie dumać i prosta padzialiŭ realny prabieh na dva.
U Hrodnie pradajecca Alfa Romeo Stelvio 2018 hoda vypusku z zajaŭlenym prabieham 67 tysiač kiłamietraŭ. Pravierka aŭtamabila pa VIN-numary pakazvaje, što minułym letam hety krasovier byŭ pradadzieny ŭ Polščy praz aŭkcyjon.
Skrynšot sajta av.by
Na momant prodažu ŭ Polščy prabieh aŭtamabila składaŭ 196 582 kiłamiery. To-bok dzieviać miesiacaŭ tamu jon byŭ u try razy bolšy, čym ciapier.
Skrynšot sajta vf.vin
Pra toje, što heta toj samy aŭtamabil, śviedčyć nie tolki numar kuzava, paznačany ŭ abjavie na sajcie, ale i šerah uskosnych pakazčykaŭ, naprykład, abaviazkovaja dla Polščy nalepka na łabavym škle, jakaja dubluje rehistracyjny numar aŭtamabila, i ramka pad numaram.
Skrynšot sajta vf.vin
Ale daloka nie ŭsie amatary «amaładzić» mašynu robiać heta tak dziorzka. Naprykład, VW Arteon, jaki pradajuć u Breście, pa darozie ź Bielhii ŭ Biełaruś zhubiŭ usiaho kala 50 tysiač kiłamietraŭ.
Na momant prodažu ŭ Bielhii vosieńniu minułaha hoda hety VW mieŭ prabieh 196 582 km. Ciapier jaho pradajuć z zajaŭlenym prabieham 153 187 kiłamietraŭ.
Skrynšot sajta vf.vin
Skrynšot sajta av.by
Ramki pad numarami, jak i ŭ vypadku z čyrvonaj Alfa Romeo, zastalisia tyja, što stajali padčas prodažu ŭ ES.
Fota: skrynšot z sajta vf.vin
Jaki maštab padmanu?
My pravieryli VIN-numary 30 aŭtamabilaŭ. Try ź ich mieli źmienienyja pakazčyki prabiehu. Jašče ŭ dvuch vypadkach vyśvietliłasia, što ŭkazany ŭ abjavie numar kuzava naležyć inšamu aŭtamabilu anałahičnaj marki i madeli. Heta taksama musić naściarožyć patencyjnaha kupca, bo daśviedčanyja pradaŭcy aŭto viedajuć, što pa VIN-numary mašyny možna atrymać šmat infarmacyi pra jaje.
Jak biaspłatna pravieryć aŭto?
Kali havorka idzie pra aŭtamabili ź Jeŭropy ci ZŠA, to pieršaje, što vam treba zrabić — uvieści numar kuzava ŭ pošukavik. Taki prosty sposab moža vyvieści vas na admysłovyja sajty, dzie zachoŭvajecca infarmacyja ab pradadzienych praz aŭkcyjony aŭto. Ale časam taki sposab daje zboj, tamu nie lišnim budzie asobna nacisnuć jašče i na hrafu «vidarysy».
Taksama aŭkcyjonnyja aŭto ź Jeŭropy možna pravieryć na sajtach vf.vin abo vinfax.site. A dla aŭto sa Štataŭ lepiej pasuje bidfax.info.
Čytajcie taksama:
Navat «karčy» padaraželi na 20-30%. Jak pa nazirańniach pradaŭcoŭ źmianilisia ceny na staryja aŭtamabili
Letaś fizasoby impartavali ŭ 2,4 raza bolš mašyn, čym hod tamu. Jakija aŭto čaściej vieźli ź Jeŭropy i ZŠA?
Ź Litvy ŭ Biełaruś vyvoziać rekordnuju kolkaść aŭto. Ale ŭ našaj krainie jany nie zatrymlivajucca
