Ad 35 dalaraŭ u miesiac. Pa jakich cenach zdajuć kvatery ŭ rajcentrach
Pahladzieli, kolki spatrebicca hrošaj, kab zdymać kvateru ŭ Maładziečnie, Salihorsku, Pinsku i inšych haradach, a taksama ŭ jakim rajcentry samaje darahoje arendnaje žyllo.
Arendnaja kvatera ŭ Salihorsku. Fota: re.kufar.by
U niekalki razoŭ tańniej, čym u stalicy
Zhodna sa statystykaj Realt.by, pa stanie na kaniec lutaha siarednija staŭki na arendu žytła ŭ stalicy vyhladajuć nastupnym čynam: 271 dalar u miesiac za adnapakajoŭku, 331 — za dvuchpakajoŭku i 467 dalaraŭ za trochpakajoŭku. Kolkaść prapanoŭ u stalicy raście, a popyt, naadvarot, pamianšajecca, što pastupova adbivajecca na cenach.
Staŭki na doŭhaterminovuju arendu kvater navat u samych zamožnych rajcentrach krainy kudy bolš nizkija. Tak, naprykład, u Salihorsku adnapakajoŭku možna znajści pa canie 90—120 dalaraŭ za miesiac. Praŭda, za takija hrošy možna raźličvać tolki na kvateru biez sučasnaha ramontu.
Dvuchpakajoŭki ŭ Salihorsku zdajuć pa canie ad 120 da 250 dalaraŭ u miesiac u zaležnaści ad rajona, azdableńnia i ramontu.
Skrynšot z sajta kufar.by
Trochpakajovyja kvatery ŭ Salihorsku zdajuć u arendu pa canie ad 175 da 250 dalaraŭ.
Samaja darahaja kvatera ŭ Salihorsku — trochpakajoŭka za 470 dalaraŭ u miesiac. Kvatera znachodzicca ŭ centry. Zdajecca z meblaj, technikaj i posudam.
Staŭki na arendu ŭ zamožnym Salihorsku i blizkim da stalicy Maładziečnie nie paraŭnalnyja ź nievialikimi rajcentrami Minskaj vobłaści, jakija znachodziacca na adlehłaści bolš za 100 kiłamietraŭ ad MKAD.
Navat u susiednim Słucku rascenki kudy bolš demakratyčnyja, čym u horadzie šachcioraŭ. Samaja darahaja prapanova — dvuchpakajoŭka za 270 dalaraŭ. Usie astatnija kvatery, u tym liku trochpakajoŭki, zdajuć pa canie ad 70 da 200 dalaraŭ.
U Starych Darohach adnapakajoŭku možna arandavać usiaho za 60 dalaraŭ u miesiac, a trochpakajoŭku — za 100. Padobnaja situacyja z arendaj u Vilejcy: tam adnapakajoŭku prapanujuć za 55 dalaraŭ u miesiac, a trochpakajoŭku za 100.
U Oršy, aproč adnoj trochpakajoŭki za 350 i dvuchpakajoŭki za 245, usie kvatery ŭ doŭhaterminovuju arendu zdajuć pa canie da 180 dalaraŭ.
Skrynšot z sajta kufar.by
Za samyja tannyja 1—2-pakajovyja kvatery ŭ Oršy prosiać ad 60 da 90 dalaraŭ u miesiac.
Za arendu kvatery ŭ Pinsku ŭ zaležnaści ad kolkaści pakojaŭ i ramontu prosiać ad 70 da 150 dalaraŭ u miesiac.
U takich haradach, jak Hancavičy, Łuniniec, Lachavičy, staŭki na arendu žylla startujuć z adznaki 50 dalaraŭ.
Samy darahi rajcentr krainy — Astraviec. Tam samyja tannyja prapanovy pačynajucca sa 150 dalaraŭ. Najbolš darahija varyjanty zdajuć u arendu za $350.
Antypod Astraŭca — Ružany. Tam zdajecca adna z samych tannych kvater Biełarusi. Za miesiac pražyvańnia ŭ adnapakajoŭcy daviadziecca płacić usiaho 100 rubloŭ u miesiac (kala $35).
Čytajcie taksama:
Ad 10 da 270 tysiač dalaraŭ. Dačy ŭ vakolicach Minska pradajucca pa canie kvater
