Śmierć ukrainskaha bajca na miažy ź Biełaruśsiu: vyniki papiaredniaha rasśledavańnia
33-hadovy bajec ukrainskaj terytaryjalnaj abarony Siarhiej Panasiuk zahinuŭ 25 lutaha padčas vykanańnia bajavoha zadańnia. Trahiedyja adbyłasia na naziralnym poście ŭkrainska-biełaruskaj miažy. Rodnyja vajskoŭca ličać, što jaho zabili strełam ź biełaruskaha boku. Ukrainski bok raspavioŭ pra pieršyja vyniki rasśledavańnia.
Siarhiej Panasiuk. Fota: ź siamiejnaha alboma
Śledstvam ustanoŭlena, što zdareńnie adbyłosia 25 lutaha kala 02:00 pablizu vioski Tur Kovielskoho rajona Vałynskaj vobłaści.
«Vajskoŭcy pad kamandavańniem kamandzira adkryli ahoń pa celi paśla atrymańnia paviedamleńnia ab zjaŭleńni nieviadomych asob u rajonie miažy Ukrainy ź Biełaruśsiu»,
— paviedamiŭ dyrektar terytaryjalnaha ŭpraŭleńnia Dziaržaŭnaha biuro rasśledavańniaŭ (DBR) u Lvovie Rusłan Laško.
U vyniku adzin z vajskoŭcaŭ byŭ paranieny i pamior padčas transparciroŭki.
U DBR adznačyli, što ŭžo dapytanyja ŭsie śviedki, rasśledavańnie praciahvajecca. U ciapierašni čas pryznačanyja ekśpiertyzy, pa vynikach jakich buduć ustanoŭlenyja abstaviny zdareńnia.
Z pačatku poŭnamaštabnaha ŭvarvańnia Rasii heta adzinaja kryminalnaja vytvorčaść u Lvoŭskim upraŭleńni SKB ab parušeńni pravił niasieńnia bajavoha dziažurstva.
Bolš padrabiazna pra rasśledavańnie hibieli sałdata ŭ Biuro nie paviedamlajuć, spasyłajučysia na tajamnicu śledstva.
«Inšyja źviestki ŭtrymlivajuć tajnu dasudovaha rasśledavańnia, i ŭ metach zabieśpiačeńnia intaresaŭ śledstva dostup da ich abmiežavany», — havorycca ŭ adkazie.
- 27 lutaha stała viadoma, što na ŭkrainska-biełaruskaj miažy padčas vykanańnia bajavoha zadańnia zahinuŭ 33-hadovy vajskoviec teraabarony Vałyni Siarhiej Panasiuk.
- Siarhiej Panasiuk byŭ udzielnikam ATA. U rady terabarony staŭ u pieršyja dni poŭnamaštabnaha ŭvarvańnia. Byŭ kamandziram strałkovaha ŭzvoda. U jaho zastalisia dačka i syn.
- U sacsietkach zjaviłasia niepravieranaja infarmacyja pra nibyta abstreł z boku Biełarusi. Rodnyja vajskoŭca taksama ličać, što jaho zabili strełam ź biełaruskaha boku. Pamiežny kamitet RB admaŭlaŭ, što ź ich boku viałasia stralba.





